انڈیگو کے عالمی سیلز کے سربراہ ونئے ملہوترا کا استعفیٰ

نئی دہلی، 4 مئی (یو این آئی) نجی فضائی کمپنی انڈیگو کے عالمی سیلز کے سربراہ ونئے ملہوترا نے پیر کے روز اپنے عہدے سے استعفیٰ دے دیا۔
ایئرلائن نے اسٹاک ایکسچینج کو دی گئی اطلاع میں کہا ہے کہ انہیں 3 جولائی کی شام ان کی ذمہ داریوں سے سبکدوش کر دیا جائے گا۔ اپنے استعفے میں ملہوترا نے کمپنی کے منیجنگ ڈائریکٹر راہل بھاٹیا کو بتایا کہ وہ ہوا بازی کی صنعت سے باہر مشاورتی کردار میں اپنے کیریئر کو آگے بڑھانا چاہتے ہیں۔
انہوں نے گزشتہ چار برس کے دوران انڈیگو کے ساتھ کام کرنے کے موقع پر شکریہ ادا کرتے ہوئے کہا کہ وہ 3 جولائی تک نوٹس پیریڈ کے دوران اپنی ذمہ داریاں انجام دیتے رہیں گے۔
گزشتہ سال دسمبر کے اوائل میں انڈیگو کی پروازوں میں بڑے پیمانے پر خلل کے بعد کمپنی کی اعلیٰ انتظامیہ میں یہ دوسرا بڑا استعفیٰ ہے۔ اس سے قبل کمپنی کے چیف ایگزیکٹو آفیسر پیٹر ایلبَرز نے مارچ میں ذاتی وجوہات کی بنا پر فوری اثر سے استعفیٰ دے دیا تھا، جس کے بعد عبوری طور پر راہل بھاٹیا انتظامی ذمہ داریاں سنبھال رہے ہیں۔
واضح رہے کہ انڈیگو اس وقت ہندوستان کی سب سے بڑی ایئرلائن ہے اور گھریلو مسافروں کے اعتبار سے اس کا مارکیٹ شیئر 60 فیصد سے زائد ہے۔