بنگلورو، 25 اپریل (یو این آئی) وراٹ کوہلی نے دیودت پڈیکل کے ساتھ اپنی 115 رن کی شراکت کو رائل چیلنجرز بنگلورو (آر سی بی) کی گجرات ٹائٹنز کے خلاف 206 رن کے کامیاب تعاقب میں "میچ کا ٹرننگ پوائنٹ” قرار دیا۔ کوہلی کو 44 گیندوں پر 81 رن (آٹھ چوکے اور چار چھکے) کی شاندار اننگز کے لیے پلیئر آف دی میچ منتخب کیا گیا، جبکہ آر سی بی سات میچوں میں پانچویں جیت کے ساتھ دوسرے مقام پر پہنچ گئی۔
کوہلی نے کہا کہ ابتدا میں پچ کو سمجھنا ضروری تھا کیونکہ حریف کے پاس معیاری گیندبازی اٹیک موجود تھا۔ انہوں نے کہا کہ منصوبہ یہ تھا کہ ابتدائی اوورز میں حالات کو سمجھا جائے اور پھر موقع ملتے ہی کھیل کو آگے بڑھایا جائے۔ انہوں نے دیودت پڈیکل کی تعریف کرتے ہوئے کہا کہ وہ اس سیزن میں ایک بار پھر آتے ہی جارحانہ انداز میں کھیلتے نظر آئے۔
پڈیکل نے 27 گیندوں پر 55 رن اسکور کیے اور مڈل اوورز میں ٹیم کو مطلوبہ رن ریٹ سے آگے رکھا۔ کوہلی نے کہا کہ کگیسو رباڈا کے خلاف ان کا پہلا چوکا شاندار تھا اور ان میں گیم اویئرنیس اور صلاحیت موجود ہے کہ وہ درست شاٹس کھیلتے ہوئے ٹیم کو فائدہ پہنچائیں۔
کوہلی نے کہا، "میں صرف کھیل میں قائم رہنا چاہتا تھا تاکہ اس پر زیادہ دباؤ نہ آئے اور میری ذمہ داری تھی کہ صحیح وقت پر باؤنڈری لگاؤں۔ وہ شراکت ہمارے لیے میچ جتوانے والی ثابت ہوئی۔”
ڈیٹھ اوورز میں جہاں گجرات کی رفتار سست پڑ گئی، وہیں آر سی بی نے وکٹیں گرنے کے باوجود رن رفتار برقرار رکھی۔
کرونال پانڈیا نے ساتویں نمبر پر آ کر 12 گیندوں پر ناٹ آؤٹ 23 رن بنا کر میچ ختم کیا۔
کوہلی نے کہا کہ ٹیم کے پاس مضبوط بلے بازی لائن اپ موجود ہے، جس میں ایسے کھلاڑی شامل ہیں جو معیاری شاٹس کھیل کر گیندبازوں پر دباؤ ڈال سکتے ہیں، جبکہ ٹم ڈیوڈ اور روماریو شیفرڈ کی پاور ہٹنگ ٹیم کو مزید اعتماد دیتی ہے۔
انہوں نے کہا کہ ٹیم کا پیغام واضح ہے: اگر باؤنڈری مارنے کے قابل گیند ملے تو اعتماد کے ساتھ شاٹ کھیلیں۔آر سی بی نے چناسوامی اسٹیڈیم میں اپنے لیگ مرحلے کے میچ مکمل کر لیے ہیں اور اب ٹیم اگلے تین میچ باہر کھیلے گی، جس کے بعد رائے پور میں اپنے ہوم میچز ختم کرے گی۔
کوہلی نے چناسوامی اسٹیڈیم کو ایک خاص مقام قرار دیتے ہوئے کہا کہ امید ہے ٹیم ٹورنامنٹ کے آخری مرحلے میں یہاں واپس آئے گی اور شائقین کو ایک بار پھر محظوظ کرے گی۔
آر سی بی کا اگلا میچ 27 اپریل کو دہلی میں دہلی کیپٹلز کے خلاف ہوگا، جو کوہلی کا گھریلو میدان بھی ہے۔
