ایجنسیز
جموں؍۱۸؍اپریل
جموں و کشمیر اور لداخ ہائی کورٹ نے سالانہ دربار موو کے تحت اپنے مرکزی ونگ کو موسمِ گرما کے لیے جموں سے سری نگر منتقل کرنے کے احکامات جاری کر دیے ہیں۔
حکم نامے کے مطابق ہائی کورٹ کا مرکزی ونگ، چیف جسٹس کے پرنسپل سیکریٹری کا دفتر، رجسٹرار ویجیلنس، ڈائریکٹر جے اینڈ کے جوڈیشل اکیڈمی، رجسٹرار رولز، رجسٹرار آئی ٹی اور سینٹرل پروجیکٹ کوآرڈی نیٹر (ای کورٹز) سمیت متعدد دفاتر۳۰؍اپریل کو دفتری اوقات کے اختتام پر جموں میں بند کر دیے جائیں گے۔
یہ دفاتر۴مئی کو صبح کے وقت سری نگر میں دوبارہ کام شروع کریں گے۔
حکم میں یہ بھی کہا گیا ہے کہ دربار موو کے تحت منتقل ہونے والے ملازمین کو۲۵ہزار روپے فی کس خصوصی الاؤنس دیا جائے گا، جبکہ مقررہ وقت میں منتقلی نہ کرنے والے ملازمین اس سہولت کے حقدار نہیں ہوں گے۔
