ایجنسیز
سرینگر؍۹؍اپریل
اینٹی کرپشن بیورو (اے سی بی) نے جمعرات کو کولگام میں ایک پنچایت سیکریٹری کو منریگا مزدوروں کے بلوں کی منظوری کے سلسلے میں مبینہ طور پر۵ہزار روپے رشوت لیتے ہوئے رنگے ہاتھوں گرفتار کر لیا۔
ترجمان نے ایک بیان میں کہا کہ جموں و کشمیر اینٹی کرپشن بیورو کو ایک تحریری شکایت موصول ہوئی جس میں بتایا گیا کہ بلاک دیوسر کولگام کے پنچایت سیکریٹری (وی ایل ڈبلیو) شیخ زادہ عرفان ولد شیخ اے بی رشید ساکن منی وارہ ضلع اننت ناگ، شکایت کنندہ سے منریگا کاموں کے تحت مزدوری کے بلوں کی ادائیگی کیلئے۱۰ہزار روپے رشوت طلب کر رہا ہے، جو بعد میں طے ہو کر۵ہزار روپے پر آ گئی۔
ترجمان نے کہا کہ شکایت کنندہ نے رشوت دینے کے بجائے قانونی کارروائی کے لیے اینٹی کرپشن بیورو کے پولیس اسٹیشن سے رجوع کیا۔
ترجمان نے کہا ’’شکایت موصول ہونے پر خفیہ تصدیق کی گئی جس میں مذکورہ سرکاری ملازم کی جانب سے رشوت طلب کرنے کی تصدیق ہوئی، جس کے بعد پولیس اسٹیشن اے سی بی اننت ناگ میں ایف آئی آر نمبر۰۴/۲۰۲۶درج کر کے انسداد بدعنوانی ایکٹ۱۹۸۸کی دفعہ۷ مع ترمیمی ایکٹ۲۰۱۸ کے تحت مقدمہ درج کیا گیا اور تحقیقات شروع کی گئی۔
ترجمان نے مزید کہا کہ تحقیقات کے دوران ایک ٹریپ ٹیم تشکیل دی گئی جس نے کامیاب کارروائی کرتے ہوئے مذکورہ سرکاری ملازم کو رشوت طلب کرتے اور وصول کرتے ہوئے رنگے ہاتھوں گرفتار کر لیا۔ اسے موقع پر ہی حراست میں لیا گیا اور رشوت کی رقم بھی اس کی تحویل سے آزاد گواہوں کی موجودگی میں برآمد کی گئی۔
بعد ازاں ملزم سرکاری ملازم کے رہائشی مکان کی تلاشی ایگزیکٹو مجسٹریٹ اور آزاد گواہوں کی موجودگی میں لی گئی۔ بیان میں کہا گیا ہے کہ اس معاملے کی مزید تحقیقات جاری ہے۔
