نائب صدرجمہوریہ نے سُدھا مورتی کی کتاب کا اجرا کیا، پارلیمنٹ کی دیواروں پر نقش تصاویر میں ہندوستان کا تہذیبی سفر نمایاں

نئی دہلی، یکم اپریل (یو این آئی) نائب صدر جمہوریہ سی پی رادھا کرشنن نے بدھ کے روز یہاں پارلیمنٹ ہاؤس کے ‘سمویدھان سدن’ میں راجیہ سبھا کی رکن پارلیمنٹ سُدھا مورتی کی تحریر کردہ کتاب ‘ٹائڈز آف ٹائم: بھارتس ہسٹری تھرو میورلز ان پارلیمنٹ’ کا اجرا کیا۔
مسٹر رادھا کرشنن نے کتاب کی ستائش کرتے ہوئے اپنے خطاب میں کہا کہ اس میں پارلیمنٹ کی دیواروں پر بنے نقش و نگار (میورلز) کی لازوال خوبصورتی اور گہری علامتی اہمیت کو مؤثر طریقے سے پیش کیا گیا ہے۔ انہوں نے کہا کہ یہ تصاویر محض فن پارے نہیں ہیں، بلکہ ہندوستان کے تہذیبی سفر کی عکاسی کرنے والی زندہ کہانیاں ہیں، جو نسلوں کو تاریخ سے جوڑتی ہیں۔
انہوں نے اپنے خطاب میں کہا کہ ہندوستان کی جمہوری روایات قدیم زمانے سے ہی ہمہ گیر اور معاشرے میں گہرائی تک پیوست ہیں۔ شمال میں ‘ویشالی’ سے لے کر جنوب کے ‘کُڈا وولائی’ نظام تک، مکالمے، اتفاق رائے اور متنوع خیالات کے احترام کی روایت ہندوستان کو ” مادرجمہوریت ” بناتی ہے۔
نائب صدر نے سبرامنیم بھارتی کے خیالات کا حوالہ دیتے ہوئے ہندوستان کی ثقافتی خوشحالی اور علمی روایت کو اجاگر کیا۔ اس کے ساتھ ہی انہوں نے وزیراعظم نریندر مودی کی قیادت میں پارلیمنٹ میں روایتی علامتوں کی شمولیت کی بھی تعریف کی۔ انہوں نے کہا کہ یہ کتاب 124 نقش و نگار کے ذریعے ہندوستان کی تاریخ کو زندہ کرتی ہے، جس میں وادی سندھ کی تہذیب سے لے کر مہارشی والمیکی، چانکیہ، مہاویر اور گوتم بدھ کی تعلیمات تک کا تفصیلی تذکرہ موجود ہے۔ انہوں نے مزید کہا کہ کتاب میں مہاتما گاندھی اور سبھاش چندر بوس جیسے عظیم رہنماؤں کی خدمات سمیت تحریک آزادی کے اہم ابواب کو بھی شامل کیا گیا ہے۔
مسٹر رادھا کرشنن نے ‘وکاس بھی، وراثت بھی’ کے اصول کو دہراتے ہوئے کہا کہ ترقی اور ثقافتی ورثہ ایک دوسرے کے تکملہ ہیں۔ انہوں نے شہریوں سے "نیشن فرسٹ” کا جذبہ اپنانے اور ایمانداری و لگن کے ساتھ ملک کی خدمت کرنے کی اپیل کی۔
اس تقریب میں اوم برلا، جے پی نڈا، منوہر لال، ہری ونش سمیت کئی معزز شخصیات، ارکان پارلیمنٹ اور لوک سبھا و راجیہ سبھا سکریٹریٹ کے سینئر افسران موجود تھے۔