ایئر انڈیا نے چھ سال بعد روم کے لیے پرواز شروع کی

نئی دہلی، 26 مارچ (یو این آئی) ٹاٹا گروپ کی فضائی کمپنی ایئر انڈیا نے چھ سال کے وقفے کے بعد اٹلی کے دارالحکومت روم کے لیے دوبارہ پرواز کا آغاز کر دیا ہے۔
ایئر انڈیا کی پرواز نمبر اے آئی 123 بدھ کے روز دہلی سے روم کے فیومیچینو ہوائی اڈے کے لیے روانہ ہوئی۔ یہ نان اسٹاپ پرواز ہفتے میں چار دن چلائی جائے گی۔
روم اب یورپ میں ایئر انڈیا کا آٹھواں اور میلان کے بعد اٹلی کا دوسرا مقام بن گیا ہے۔ اس سے پہلے ایمسٹرڈیم، کوپن ہیگن، فرینکفرٹ، میلان، پیرس، ویانا اور زیورخ کے لیے نان اسٹاپ خدمات دستیاب ہیں۔
روم میں ہندستانی سفارت خانے کے معززین، فیومیچینو ہوائی اڈے کے حکام اور ایئر انڈیا کے عملے نے اس پرواز کا استقبال کیا۔ انہوں نے روم سے روانہ ہونے والی واپسی پرواز کا افتتاح بھی کیا، جو جمعرات کی صبح 10:29 بجے دہلی پہنچی۔
ایئر انڈیا کے چیف کمرشل آفیسر نپون اگروال نے کہا کہ ہند۔ یورپ کے درمیان سفر کی مانگ سیاحت اور کاروبار دونوں شعبوں میں مسلسل بڑھ رہی ہے۔۔
اٹلی تجارت، سیاحت اور ثقافتی تبادلے کے شعبوں میں ہندساتن کا ایک اہم شراکت دار ہے۔ سال 2025 میں دونوں ممالک کے درمیان دوطرفہ تجارت 14 ارب ڈالر سے تجاوز کر گئی۔ اٹلی میں دو لاکھ سے زائد ہندستانی نژاد افراد مقیم ہیں، جو دونوں ملکوں کے درمیان بڑھتی ہوئی سفری مانگ میں اہم کردار ادا کر رہے ہیں۔
ایروپورتی دی روما کے چیف ایوی ایشن آفیسر ایوان باساتو نے کہا، “ہم روم میں ایئر انڈیا کی آمد کا خیر مقدم کرتے ہیں۔ دہلی کے لیے یہ نئی براہِ راست پرواز ہماری خدمات کو بہتر بناتی ہے اور اٹلی و ہندستان کے درمیان بڑھتی ہوئی سفری مانگ کو پورا کرتی ہے۔”
یہ پرواز ہفتے میں چار دن یعنی پیر، بدھ، جمعہ اور اتوار کو چلائی جائے گی۔ اس روٹ پر بی 787-8 طیارہ استعمال کیا
جا رہا ہے، جس میں بزنس کلاس میں 18 مکمل فلیٹ بیڈ نشستیں اور اکانومی کلاس میں 241 نشستیں موجود ہیں۔