تجارتی ایل پی جی صارفین کو سلنڈر کی فراہمی شروع: حکومت

نئی دہلی، 14 مارچ (یواین آئی) حکومت نے ہفتہ کو کہا کہ مختلف ریاستوں میں تجارتی صارفین کو اب ایل پی جی گیس سلنڈروں کی فراہمی شروع کر دی گئی ہے اور انہیں اپنے علاقوں میں دستیاب پائپ والی قدرتی گیس کنکشن اپنانے کا مشورہ بھی دیا جا رہا ہے۔
اسی دوران ایل پی جی سے لدے دو ہندوستانی جہاز آبنائے ہرمز سے نکل کر ہندوستان کے لیے روانہ ہو چکے ہیں اور وہ 16 اور 17 مارچ کو گجرات کی بندرگاہوں پر پہنچ سکتے ہیں، جس سے ایل پی جی کی فراہمی بڑھانے میں مدد ملے گی۔ ایل پی جی کے ذخائر بڑھانے کے لیے خلیجی ممالک کے علاوہ دیگر ممالک سے بھی خریداری کی بات کی جا رہی ہے۔
حکومت نے یہ بھی کہا ہے کہ ملک میں ایل پی جی کی گھریلو پیداوار میں مغربی ایشیا کے تنازع کے شروع ہونے کے بعد سے اب تک 31 فیصد اضافہ ہو چکا ہے اور اس کا کافی ذخیرہ موجود ہے۔ گھریلو صارفین کو گھبراہٹ میں بکنگ کرنے کی ضرورت نہیں ہے اور نہ ہی انہیں ڈسٹری بیوٹرز کے پاس لائن لگانے کی ضرورت ہے۔ حکومت نے اپیل کی ہے کہ گھریلو صارفین سلنڈر کے لیے صرف آن لائن طریقوں سے ہی بکنگ کریں اور اگر ممکن ہو تو وہ بھی پی این جی کنکشن لیں۔
مختلف وزارتوں کے افسران نے مغربی ایشیا بحران سے پیدا شدہ صورتحال پر یہاں باقاعدہ میڈیا بریفنگ میں ایندھن کی فراہمی، خلیجی علاقے میں پھنسے ہندوستانی پرچم والے جہازوں اور ملاحوں، علاقے میں پھنسے ہندوستانی شہریوں کی نکاسی اور کھاد کی فراہمی جیسے مسائل پر تازہ معلومات دیں۔ افسران نے بتایا کہ ملک میں یوریا سمیت مختلف قسم کی کھاد کافی مقدار میں دستیاب ہے۔ حکومت کسانوں کو یقین دلانا چاہتی ہے کہ آئندہ کئی مہینوں کے لیے ان کی ضرورت کے مطابق ملک میں تمام اہم کھادوں کا ذخیرہ پچھلے سال کے مقابلے میں کافی زیادہ ہے۔
پیٹرولیم و قدرتی گیس وزارت میں جوائنٹ سکریٹری سجاتا شرما نے بتایا کہ 29 ریاستوں اور مرکز کے زیر انتظام علاقوں میں تجارتی ایل پی جی سلنڈروں کی فراہمی شروع کر دی گئی ہے۔ یہ کام ریاستی حکومتوں کے ذریعے کیا جا رہا ہے۔ انہوں نے کہاکہ "مغربی ایشیا بحران کے باعث ایل پی جی کی صورتحال کو لے کر فکر ضرور ہے لیکن ہمارے پاس ترجیحات کو پورا کرنے کے لیے کافی ذخیرہ موجود ہے۔”
انہوں نے کہا کہ کچھ لوگ گھبراہٹ میں بکنگ کر رہے ہیں۔ کل سلنڈر کی روزانہ بکنگ 76 لاکھ سے بڑھ کر 88 لاکھ ہو گئی تھی، جو ظاہر کرتی ہے کہ لوگ گھبراہٹ میں بکنگ کر رہے ہیں۔ انہوں نے اپیل کی کہ لوگ ڈیجیٹل بکنگ کریں، انہیں سلنڈر گھر پر پہنچا دیا جائے گا۔