ایران کے حملوں میں 500 سے زائد امریکی فوجی ہلاک ہوچکے ہیں: علی لاریجانی کا دعویٰ

تہران، 5 مارچ (یو این آئی) ایرانی قومی سلامتی کونسل کے سربراہ علی لاریجانی نے دعویٰ کیا ہےکہ ایران کے حملوں میں 500 سے زائد امریکی فوجی ہلاک ہوچکے ہیں۔
ایکس پر جاری بیان میں علی لاریجانی کا کہنا تھا کہ ٹرمپ نے نیتن یاہو کی مضحکہ خیز حرکتوں کے نیتجے میں امریکی عوام کو ایران کے خلاف ناجائز جنگ میں جھونک دیا ہے۔
علی لاریجانی کا کہنا تھا کہ اب وہ خود حساب کریں کیونکہ حالیہ دنوں میں 500 سے زائد امریکی فوجی مارے جاچکے ہیں، کیا اب بھی امریکہ فرسٹ (پہلے) ہے یا اسرائیل؟
ایرانی قومی سلامتی کونسل کے سربراہ کا مزید کہنا تھا کہ سپریم لیڈر آیت اللہ خامنہ ای کی شہادت کی آپ کو بھاری قیمت چکانا پڑے گی۔
دوسری جانب امریکی حکام نے کانگریس کو بند کمرہ بریفنگ میں بتایا ہےکہ ایران کے شاہد ڈرونز امریکی فضائی دفاع کیلئے ایک بڑا چیلنج بن چکے ہیں اور ممکن ہے کہ تمام ڈرونز کو روکا نہ جا سکے۔
بریفنگ میں موجود 2 ذرائع نے سی این این کو بتایا کہ وزیر دفاع پیٹ ہیگستھ اور چیئرمین جوائنٹ چیفس آف اسٹاف جنرل ڈین کین نے تسلیم کیا کہ یہ ڈرون توقع سے زیادہ بڑا مسئلہ پیدا کر رہے ہیں کیونکہ یہ کم بلندی اور کم رفتار سے پرواز کرتے ہیں جس کی وجہ سے انہیں بیلسٹک میزائلوں کے مقابلےمیں روکنا زیادہ مشکل ہے۔
تاہم بعض حکام نے خدشات کو کم ظاہر کرنے کی کوشش کی اور کہا کہ خلیجی اتحادی ممالک بڑی تعداد میں انٹرسیپٹر میزائل ذخیرہ کر رہے ہیں ۔