تلنگانہ کے جگتیال کے ایک شخص نے لاکھوں خرچ کر کے زندگی میں ہی سنگ مرمر سے اپنا عالیشان مقبرہ تعمیر کروا لیا

حیدرآباد 20نومبر(یواین آئی) تلنگانہ کے ضلع جگتیال میں ایک عجیب و غریب واقعہ پیش آیا ہے جہاں لکشمی پور سے تعلق رکھنے والے این اندریا نامی ایک شخص نے اپنی زندگی میں ہی اپنے کھیت میں اپنا عالیشان مقبرہ تعمیر کروا کر سب کو حیرت میں ڈال دیا ہے ۔
اطلاعات کے مطابق اندریا نے دو گنٹہ اراضی پر تقریباً 15 لاکھ روپے کی لاگت سے سنگ مرمر کا استعمال کرتے ہوئے یہ مقبر ہ چینئی کے کاریگروں سے تعمیر کروایا۔
اندریا نے اپنے اس اقدام کی وجہ بتاتے ہوئے کہا کہ وہ روزگار کی تلاش میں ممبئی اور پھر دبئی گیا تھا جہاں مزدوری کرنے سے لے کر چھوٹے کنٹراکٹربننے تک اس نے کئی طرح کے کام کئے ۔دبئی میں ایک عرب شیخ سے دوستی کے بعد وہ ہندوستان میں واپس 20 ایکڑ اراضی خریدنے میں کامیاب ہوا۔
اتنی بڑی دولت اور اراضی حاصل کرنے کے بعد اس کے ذہن میں یہ خیال آیا کہ اصل میں میرا اپنا کیا ہے ؟ اسی سوچ کے تحت اس نے اپنے مرنے کے بعد بچوں کو پریشانی یا بوجھ سے بچانے کے لئے خود ہی اپنی آخری آرام گاہ بنانے کا فیصلہ کیا۔ اندریا نے بتایا کہ اس نے یہ مقبرہ 7 لاکھ روپے کی لاگت سے تیار کروایا، جو اس کی زندگی اور فلسفہ کا عکاس ہے ۔ وہ اب روزانہ شام 4 بجے یہاں آ تا ہے ۔ اپنے درختوں کی دیکھ بھال کرتا ہے اور خوشی سے وقت گزارتاہے ۔