ہریانہ کے بعد کانگریس راجستھان، گوا میں بدلے گی ریاستی صدر، او بی سی لیڈروں کو موقع مل سکتا ہے

نئی دہلی، 30 ستمبر (یو این آئی) ہریانہ میں پارٹی کا ریاستی صدر بدلنے کے بعد کانگریس پارٹی اب دو اور ریاستوں، راجستھان اور گوا میں صدر کی تبدیلی کر سکتی ہے اور اس میں دیگر پسماندہ طبقات (او بی سی) کی قیادت کو موقع دیا جا سکتا ہے ۔
پارٹی نے حال ہی میں ہریانہ پردیش صدر کا عہدہ سینئر رہنما راؤ نریندر سنگھ کو سونپا ہے ۔ اس کے علاوہ پارٹی نے سابق وزیراعلیٰ بھوپندر سنگھ ہڈا کو ہریانہ کانگریس قانون سازپارٹی کا لیڈر مقرر کیا ہے ۔ اب پارٹی راجستھان اور گوا میں نئے ریاستی صدور کے تقرر پر سنجیدگی سے غور کر رہی ہے ۔
راجستھان میں ریاستی صدر کے لیے جن ناموں پر بحث ہو رہی ہے ان میں چھتیس گڑھ کے کانگریس انچارج جنرل سکریٹری سچن پائلٹ، مدھیہ پردیش کے انچارج ہریش چوہدری اور اشوک گہلوت حکومت میں وزیر رہ چکے اور ہنڈولی سے پارٹی کے رکن اسمبلی اشوک چندنا کے نام شامل ہیں۔ ذرائع کے مطابق مسٹر پائلٹ اس دوڑ میں فی الحال سب سے آگے ہیں۔ او بی سی طبقے سے تعلق رکھنے والے مسٹر پائلٹ اس سے قبل بھی پارٹی کے ریاستی صدر رہ چکے ہیں۔
ذرائع سے ملی اطلاع کے مطابق گوا میں گیریش چوڈنکر کو پارٹی اپنا نیا ریاستی صدر بنا سکتی ہے ۔ مسٹر چوڈنکر فی الحال پارٹی کے تمل ناڈو اور پڈوچیری کے انچارج ہیں۔ او بی سی طبقے سے آنے والے مسٹر چوڈنکر کانگریس کے سابق صدر راہل گاندھی کے کافی قریبی مانے جاتے ہیں۔
قابل ذکر ہے کہ کانگریس پارٹی اپنی تنظیم میں مسلسل تبدیلیاں کر رہی ہے ۔ ریاستی انتخابات کو مدنظر رکھتے ہوئے نئے تجربات بھی کیے جا رہے ہیں۔ اسی سلسلے کے تحت ریاستوں میں نئے ضلع صدور مقرر کیے جا رہے ہیں۔