کابینہ نے میڈیکل کالجوں میں پی جی اور یوجی سیٹوں میں اضافے کی منظوری دی

نئی دہلی، 24 ستمبر (یو این آئی) مرکزی حکومت نے اسپتالوں کو مضبوط اور اپ گریڈیشن کرنے کے لیے پوسٹ گریجویٹ کی پانچ ہزار اور انڈر گریجویٹ کی 5023 سیٹوں کے اضافے کو منظوری دی ہے ۔
مرکزی وزیر اطلاعات و نشریات اشونی ویشنو نے بدھ کو بتایا کہ وزیر اعظم نریندر مودی کی صدارت میں مرکزی کابینہ نے موجودہ ریاستی /مرکزی حکومت کے میڈیکل کالجوں/اسٹینڈ ایلون پی جی اداروں/سرکاری اسپتالوں کو مضبوط اور اپ گریڈیش کے لئے مرکزی اسپانسرڈ اسکیم (سی ایس ایس) کے تیسرے مرحلے کو منظوری دے دی ہے تاکہ پوسٹ گریجویٹ کی 5000 اور ایم بی بی ایس کے لئے 5023 سیٹیں بڑھائی جاسکیں۔
انہوں نے کہا کہ اس اقدام سے انڈر گریجویٹ طبی صلاحیت میں نمایاں اضافہ ہوگا، اضافی پوسٹ گریجویٹ نشستیں پیدا کرکے ماہر ڈاکٹروں کی دستیابی میں اضافہ ہوگا، اور سرکاری طبی اداروں میں نئی اسپیشلٹیز کا آغاز ممکن ہوسکے گا۔ اس سے ملک میں ڈاکٹروں کی مجموعی دستیابی مضبوط ہوگی۔ ان دونوں اسکیموں کا کل مالی بوجھ 2025-26 سے 2028-29 کی مدت کے لیے 15034.50 کروڑ روپے ہے ، جس میں مرکزی حصہ 10303.20 کروڑ روپے اور ریاست کا حصہ 4731.30 کروڑ روپے ہے ۔
انہوں نے کہا کہ ان اسکیموں کا مقصد 2028-29 تک سرکاری اداروں میں 5,000 پی جی سیٹیں اور 5,023 یوجی سیٹیں بڑھانا ہے ۔ اسکیموں کے نفاذ کے لیے تفصیلی رہنما خطوط صحت اور خاندانی بہبود کی وزارت جاری کرے گی۔ اس وقت، ملک میں 808 میڈیکل کالج ہیں، جو دنیا میں سب سے زیادہ ہیں اور ان کی کل داخلہ گنجائش 123700 ایم بی بی ایس سیٹیں ہیں۔ پچھلی دہائی کے دوران 127 فیصد کا اضافہ درج کرتے ہوئے ایم بی بی ایس کی 69,352 سے زیادہ نئی نشستیں شامل کی گئیں۔ اسی طرح اس مدت کے دوران 43041 پی جی سیٹوں کا اضافہ کیا گیا، جو 143 فیصد کے متاثر کن اضافے کی نمائندگی کرتا ہے ۔ طبی نشستوں کی تعداد میں اس نمایاں اضافے کے باوجود، کچھ خطوں کو صحت کی دیکھ بھال کی طلب، رسائی، اور استطاعت کے مطابق صلاحیت بڑھانے کی ضرورت ہے ۔