اتراکھنڈ میں پیپر لیک پر پرینکا گاندھی کا سخت ردِعمل

نئی دہلی، 24 ستمبر (یو این آئی) کانگریس کی جنرل سیکریٹری پرینکا گاندھی واڈرا نے اتراکھنڈ میں پیپر لیک کے واقعے پر شدید برہمی کا اظہار کرتے ہوئے اس بات پر حیرت ظاہر کی کہ بچے 15-15 گھنٹے تیاری کر کے امتحان دے رہے ہیں اور حکومت میں بیٹھے لوگ 15 لاکھ روپے لے کر پرچے لیک کروا رہے ہیں۔
محترمہ واڈرا نے ایک امیدوار کے درد کا حوالہ دیتے ہوئے سوشل میڈیا پلیٹ فارم ایکس پر لکھا کہ ہم لائبریری میں 15-15 گھنٹے پڑھ رہے ہیں، یہ 15-15 لاکھ میں پیپر بیچ رہے ہیں۔
انہوں نے کہا کہ یہ سوال صرف ایک امیدوار کے درد کا نہیں بلکہ اتراکھنڈ سمیت ملک کے زیادہ تر نوجوانوں کا یہی درد ہے ۔ آج بیروزگاری ملک کا سب سے بڑا مسئلہ ہے ، کیونکہ اتراکھنڈ، بہار، اتر پردیش، مدھیہ پردیش سمیت جہاں بھی بی جے پی کی حکومت ہے ، وہاں بڑے پیمانے پر پیپر لیک کروائے جا رہے ہیں۔
محترمہ واڈرا نے کہا کہ امتحانات میں بڑے پیمانے پر بدعنوانی نوجوانوں کی زندگیوں کو برباد کر رہی ہے اور وزیر اعظم خاموش تماشائی بنے ہوئے ہیں۔
یہ امر قابل ذکر ہے کہ اتراکھنڈ میں جونیئر عہدوں پر بھرتی کے امتحان کا پرچہ لیک ہونے کے بعد ایک سرکاری کلرک کا ویڈیو منظرِ عام پر آیا ہے ، جس میں وہ ملازمت دلانے کے لیے 15 لاکھ روپے کا مطالبہ کر رہا ہے ۔