ہاکی کے عظیم کھلاڑیوں نے پنجاب ہاکی لیگ کی تعریف کی

موہالی، 12 ستمبر (یواین آئی) راؤنڈ گلاس اور ہاکی پنجاب کے مشترکہ انعقاد میں جاری پنجاب ہاکی لیگ (پی ایچ ایل) کو ہندوستان کے عظیم ہاکی کھلاڑیوں کی بھرپور حمایت مل رہی ہے۔ ان کا ماننا ہے کہ یہ لیگ ملک میں کھیل کا مستقبل بدل رہی ہے۔ 30 لاکھ روپے کی انعامی رقم، جو ہندوستان میں جونیئر ہاکی کے لیے اب تک کی سب سے بڑی رقم ہے، اور ملک بھر کی ٹیموں کی شمولیت کے ساتھ، پی ایچ ایل نے نچلی سطح پر ترقی میں نئے معیار قائم کر دیے ہیں۔
ہندوستان کے سابق فارورڈ اور ارجن ایوارڈ یافتہ پربھجوت سنگھ نے ٹورنامنٹ کے پیمانے اور وژن کی تعریف کرتے ہوئے اسے ’’نوجوانوں کے لیے سب سے بڑا پلیٹ فارم‘‘ قرار دیا۔ انہوں نے کہا، ’’یہ لیگ، جو راؤنڈ گلاس اور ہاکی پنجاب نے شروع کی ہے، شاندار پہل ہے۔ جب ایسی لیگ ہوتی ہے تو تمام جونیئرز کو موقع ملتا ہے۔ ساتھ ہی اس میں 30 لاکھ روپے کی بڑی انعامی رقم بھی ہے۔ یہ کھلاڑیوں کے لیے بڑے ٹورنامنٹ کی تیاری کا شاندار پلیٹ فارم ہے۔‘‘
2001 جونیئر ہاکی ورلڈ کپ فاتح اور دو بار ایشیا کپ جیتنے والے پربھجوت نے یہ بھی زور دیا کہ لیگ کے ہر سال منعقد ہونے سے نوجوانوں کو واضح سمت اور تحریک ملتی ہے۔ انہوں نے کہا، ’’پہلے کھلاڑیوں کو یہ نہیں پتہ ہوتا تھا کہ کون سا ٹورنامنٹ کھیلنا ہے۔ اب اس لیگ کی وجہ سے انہیں معلوم ہے کہ یہ ہر سال ہوتی ہے، اس لیے وہ اس کی تیاری کرتے ہیں۔ وہ یہاں بہترین کارکردگی دکھانا چاہتے ہیں تاکہ یہ انہیں سینیئر کیمپ میں انتخاب کا موقع دلا سکے۔‘‘
پربھجوت نے یہاں تک کہا کہ اگر ان کے دور میں بھی ایسی لیگ ہوتی تو کھلاڑیوں کا کیریئر کئی سال اور بڑھ سکتا تھا۔ ’’اگر ہمارے وقت میں ایسا پلیٹ فارم ہوتا تو مجھے لگتا ہے کھلاڑی مزید 4-5 سال کھیلتے۔ پہلے تو صرف سینیئر کھلاڑیوں کو ایسی لیگ میں موقع ملتا تھا۔ یہ لیگ جونیئر کھلاڑیوں کو بھی کھیلنے کا موقع دیتی ہے۔‘‘
ہاکی کے لیجنڈ بلجیت سنگھ نے کہا کہ اس پہل کا اثر پنجاب سے آگے بھی دکھے گا۔ انہوں نے کہا، ’’یہ شاندار پہل ہے۔ اس سے ہندوستانی ہاکی کو فروغ ملے گا۔ پنجاب کی ہاکی ہمیشہ مضبوط رہی ہے اور اب دیگر ریاستیں بھی ہماری ہاکی ثقافت سے فائدہ اٹھا سکتی ہیں۔ ایسی پہل کو باقاعدہ حمایت ملنی چاہیے تاکہ ہندوستان کو مسلسل اچھے کھلاڑی ملتے رہیں۔‘‘
بلجیت نے پورے ملک سے شمولیت اور اس سے حاصل ہونے والے تجربے کو اہم قرار دیا۔ انہوں نے کہا، ’’ہم عام طور پر اس سطح کے عمر گروپ ٹورنامنٹ نہیں دیکھتے۔ یہاں جونیئر کھلاڑی اسی معیار کی ہاکی کھیل رہے ہیں جیسی ہاکی انڈیا لیگ میں دکھتی ہے، جو بڑی بات ہے۔ جب یہ کھلاڑی ایچ آئی ایل اور دنیا بھر کے دیگر ٹورنامنٹس میں جائیں گے تو انہیں محسوس ہوگا کہ وہ پہلے ہی دباؤ کی صورتحال کے عادی ہو چکے ہیں۔‘‘
ہندوستان کے سابق کپتان راجپال سنگھ نے راؤنڈ گلاس کی تعریف کرتے ہوئے کہا کہ انہوں نے ہر سیزن میں معیار کو بلند کیا ہے۔ انہوں نے کہا، ’’یہ بہت اچھی پہل ہے۔ اس کا پورا کریڈٹ راؤنڈ گلاس کو جاتا ہے۔ انہوں نے ہاکی کو فروغ دینے کی ذمہ داری لی ہے اور پچھلے سیزن سے اس بار تک معیار میں بہتری کا سہرا انہیں ہی جاتا ہے۔‘‘ ارجن ایوارڈ یافتہ راجپال نے انعامی رقم اور قومی نمائندگی، دونوں کی اہمیت پر زور دیا۔
راجپال نے کہا، ’’دیکھئے، انعامی رقم اہم ہے۔ لیکن اتنا ہی اہم یہ بھی ہے کہ اس بار پورے ہندوستان سے کھلاڑی اس میں حصہ لے رہے ہیں۔ یہ بہت بڑی بات ہے۔ جونیئر کھلاڑیوں کے پاس پہلے کبھی ایسا پلیٹ فارم نہیں تھا جہاں وہ اپنی صلاحیت دکھا سکیں۔‘‘
ہاکی انڈیا کی منظوری اور مسلسل بڑھتی شہرت کے ساتھ، پنجاب ہاکی لیگ کو اب جونیئرز کے لیے عالمی سطح تک پہنچنے کا اہم راستہ مانا جا رہا ہے۔ جیسا کہ پربھجوت نے کہا: ’’راؤنڈ گلاس اور پنجاب ہاکی کی یہ پہل دیگر ریاستوں کو بھی ایسی لیگ شروع کرنے کے لیے متاثر کرے گی