۱۱ویںاور۱۲ویں جماعت کےامتحانی فارم کی تاریخوں کا اعلان

سرینگر/۱۱ ستمبر
جموںکشمیر بورڈ آف اسکول ایجوکیشن (جے کے بوس) نے اکتوبر۔نومبر ۲۰۱۵ سیشن کے لیے ۱۱ویں اور۱۲ویں جماعت کے سالانہ امتحانی فارم آن لائن جمع کرانے کا شیڈول جاری کر دیا ہے۔
نوٹیفکیشن کے مطابق کشمیر ڈویڑن، جموں کے سرما زون علاقوں اور کرگل و لیہہ کے طلبہ ۱۱ سے ۲۵ ستمبر تک مقررہ فیس کے ساتھ فارم جمع کرا سکتے ہیں، جبکہ ۲۶ ستمبر سے ۲؍اکتوبر اور۳ سے۹؍اکتوبر تک فارم لیٹ فیس کے ساتھ قبول کیے جائیں گے۔۹؍ اکتوبر کے بعد کوئی فارم منظور نہیں ہوگا۔
بورڈ نے ادارہ جاتی سربراہان کو مقررہ وقت کی پابندی یقینی بنانے اور طلبہ کو ہدایت دی ہے کہ وہ فارم جمع کراتے وقت اپنی تفصیلات احتیاط سے چیک کریں۔ تفصیلی رہنما خطوط اور فیس ڈھانچہ جے کے بوس کی ویب سائٹ www.jkbose.nic.in پر دستیاب ہیں۔
واضح رہے کہ جے کے بوس نومبر میں۱۰ویں، ۱۱ویں اور ۱۲ویں جماعت کے امتحانات منعقد کرے گا تاکہ کشمیر اور جموں کے سرما زون علاقوں میں تعلیمی سیشن کو مارچ کے بجائے نومبر پر منتقل کرنے کے حکومتی فیصلے پر عمل ہو سکے۔