کوچ کو پچ دیکھنے کا مکمل حق ہے : شبھمن گل

لندن// اوول میں پریکٹس سیشن کے دوران سری کے چیف گراؤنڈزمین لی فورٹس کی جانب سے ہندوستانی ٹیم کو پچ کو قریب سے دیکھنے سے روکنے کے عمل کو کپتان شبھمن گل نے غیر ضروری قرار دیا۔
ہندوستان کے ہیڈ کوچ گوتم گمبھیر اور فورٹس کے درمیان اس وقت نوک جھونک ہوئی جب وہ مین اسکوائر کے آس پاس ہجوم اور تربیتی سامان کی موجودگی سے فکرمندتھے۔ بتایا جاتا ہے کہ انہوں نے ہندوستانی ٹیم کو مشورہ دیا کہ وہ پچ سے 2.5 میٹر دور کھڑے ہو کر پچ دیکھیں۔ گمبھیر کو فورٹس کی طرف انگلی اٹھاتے اور بار بار یہ کہتے ہوئے دیکھا گیا کہ وہ ’صرف ایک گراؤنڈزمین‘ ہیں۔
گل، جو اس واقعے کے دوران میدان پر موجود نہیں تھے، نے اوول میں پانچویں ٹیسٹ کی شام سے قبل کہا، ’’کل جو کچھ ہوا، مجھے لگتا ہے کہ یہ بالکل غیر ضروری تھا۔ یہ پہلی بار نہیں کہ ہم وکٹ دیکھ رہے تھے، ہم تقریباً دو ماہ سے وہاں ہیں۔ ایک کوچ کو مکمل حق ہے کہ وہ قریب جا کر وکٹ دیکھے اور مجھے نہیں لگتا کہ اس میں کوئی غلط بات ہے۔ مجھے واقعی سمجھ نہیں آ رہا کہ کیوریٹر نے ہمیں وکٹ دیکھنے کی اجازت کیوں نہیں دی۔‘‘
گل نے کہا کہ سیریز کے پچھلے چار مقامات – ہیڈنگلے، ایجبسٹن، لارڈز اور اولڈ ٹریفرڈ – پر کسی بھی کیوریٹر نے ہندوستانی ٹیم کو پچ یا اسکوائر دیکھنے سے نہیں روکا تھا۔
گل نے کہا، ’’جہاں تک مجھے یاد ہے، ہمیں کبھی کوئی ہدایات نہیں ملیں تھیں۔ اگر آپ ربڑ کے اسپائکس پہنے ہوئے ہیں یا ننگے پاؤں ہیں، تو آپ وکٹ کو قریب سے دیکھ سکتے ہیں۔ ہم اس سیریز میں پہلے ہی چار میچ کھیل چکے ہیں، اور ہمیں پچ دیکھنے سے کسی نے نہیں روکا۔ ہم سب نے اتنا کرکٹ کھیلا ہے، ہم کوچ اور کپتان سمیت کئی بار پچ پر گئے ہیں، مجھے سمجھ نہیں آتا کہ اتنا ہنگامہ کس بات کا تھا۔‘‘
ہندوستان کے سیریز میں 2-1 سے پیچھے ہونے کے بعد، آخری ٹیسٹ سے قبل، گل سے پوچھا گیا کہ کیا ضروری میچ جیتنے کے دباؤ نے گمبھیر کے ردعمل کو ابھارا ہوگا۔
گل نے کہا، ’’بالکل نہیں، اگر کوئی پچ کیوریٹر آ کر ہمیں وکٹ کی طرف دیکھنے کے بجائے تین میٹر پیچھے سے دیکھنے کے لیے کہے گا، تو ہمارے ساتھ ایسا پہلے کبھی نہیں ہوا۔ ہم اتنا عرصہ سے کرکٹ کھیل رہے ہیں اور جب تک آپ ربڑ کے اسپائکس پہنے ہوئے ہیں یا ننگے پاؤں ہیں، آپ کو وکٹ کو قریب سے دیکھنے کی اجازت ہے۔ یہ کوچ اور کپتان کا کام ہے۔‘‘
لارڈز میں تیسرے ٹیسٹ کے بعد سے دونوں ٹیموں کے درمیان کئی بار تلخی دیکھی گئی ہے، اس کے باوجود گل نے کہا کہ انگلینڈ اور ہندوستان کے درمیان تعلقات مضبوط ہیں۔ انہوں نے کہا کہ انہیں اور ان کی ٹیم نے ان واقعات کے دوران اپنے رویے پر ’’کوئی افسوس‘‘ نہیں ہے۔
انہوں نے کہا، ’’رشتہ بہت اچھا ہے، لیکن جب آپ میدان پر ہوتے ہیں، تو آپ بالآخر میچ جیتنے کی کوشش کرتے ہیں، اور دونوں ٹیمیں کافی مقابلہ آمیز رہی ہیں اور کبھی کبھار جب آپ جوش میں ہوتے ہیں، تو آپ ایسی باتیں کر بیٹھتے ہیں یا کہہ دیتے ہیں جو شاید آپ نہ کرتے ہوں۔ لیکن میچ ختم ہونے کے بعد، دونوں ٹیموں کے درمیان باہمی احترام برقرار رہتا ہے۔‘‘