بہار کو نئی وندے بھارت ٹرین اور نئی ریل لائن کی سوغات

پٹنہ// وزیر اعظم نریندر مودی نے آج بہار کو ایک اور وندے بھارت ایکسپریس کا تحفہ دیا اور ویشالی سے دیوریا تک ایک نئی ریل لائن اور نئی ٹرین سروس کا افتتاح کیا۔
وزیر اعظم نے سیوان میں منعقدہ ایک پروگرام میں پاٹلی پتر اور گورکھپور کے مابین چلنے والی وندے بھارت ایکسپریس ٹرین کو ویڈیو لنک کے ذریعے پاٹلی پترریلوے اسٹیشن سے ہری جھنڈی دکھائی۔ مسٹر مودی نے ویشالی سے دیوریا (اتر پردیش) تک نئی ٹرین سروس اور 29 کلومیٹر کی نئی لائن کا افتتاح کیا۔اس سے دیوریا اور ویشالی کے درمیان کے علاقے کی ترقی کو ایک نئی جہت ملے گی۔ علاقے میں روزگار کے نئے مواقع پیدا ہوں گے اور مارکیٹ تک زرعی مصنوعات کی تیزی سے رسائی کو یقینی بنایا سکے گا۔
پاٹلی پتراسٹیشن پر منعقدہ پروگرام میں پٹنہ صاحب پارلیمانی حلقہ سے منتخب ہونے والے بھارتیہ جنتا پارٹی (بی جے پی) کے رکن پارلیمنٹ اور سابق مرکزی وزیر روی شنکر پرساد، بہار حکومت کے وزیر نتن نوین، پاٹلی پتر کے سابق رکن پارلیمنٹ رام کرپال یادو موجود تھے ۔ جبکہ پاٹلی پترا کی رکن پارلیمنٹ میسا بھارتی تقریب میں نظر نہیں آئیں۔
مسٹر روی شنکر پرساد نے نامہ نگاروں سے کہا کہ بہار کی ترقی وزیر اعظم کے دل میں ہے ، وہ جب بھی بہار آتے ہیں، ہزاروں کروڑ روپے کے ترقیاتی منصوبے یہاں حقیقت بن جاتے ہیں۔ ہم یہاں وندے بھارت ٹرین کو جھنڈی دکھانے آئے ہیں۔ وزیر اعظم واقعی بہار ریاست کو پسند کرتے ہیں اور اس کی ترقی کے بارے میں فکر مند ہیں۔
یہ ملک میں وندے بھارت ایکسپریس سیریز کی ٹرین سروس کی 71 ویں جوڑی ہے ۔ یہ ٹرین 384 کلومیٹر کی مسافت سات گھنٹے میں طے کرے گی۔ روٹ پر یہ اتر پردیش کے گورکھپور، کپتن گنج، پنیہوا اور بہار کے بگہا، نرکٹیاگنج، بیتیا، سگولی، باپودھام موتیہاری، مظفر پور، حاجی پور، پاٹلی پتر اسٹیشنوں پر رکے گی۔ اس ٹرین کے ذریعے سیاح چمپارن، ویشالی اور کوشی نگر جیسے مقامات پر بھی آسانی سے پہنچ سکیں گے ، جس سے سیاحت کو فروغ حاصل ہو گا۔
ٹرین 26502 اپ گورکھپور سے صبح 5:40 پر روانہ ہوگی اور دوپہر 12:45 پر پاٹلی پتر اسٹیشن پہنچے گی اور واپسی میں یہ پاٹلی پتر سے دوپہر 3:30 بجے روانہ ہوگی اور رات 10:30 بجے گورکھپور پہنچے گی۔ اس سروس کے لیے وندے بھارت ایکسپریس ٹرین کا سیٹ لگایا گیا ہے ۔ یہ ہفتے میں چھ دن چلے گی اور یہ سروس ہفتہ کودستیاب نہیں ہوگی۔
آٹھ ڈبوں والی اس وندے بھارت ایکسپریس ٹرین کے تمام ڈبے ایئرکنڈیشنڈ ہیں۔ اس ٹرین کے دروازے آٹومیٹک ہیں۔ مسافروں کو صاف بایو ٹوائلٹس کی سہولت ملے گی۔ ٹرین میں جی پی ایس پر مبنی معلوماتی اسکرین بھی ہے ۔ مسافروں کو آن بورڈ کھانا اور پانی ملے گا۔ مسافروں کی حفاظت کو مدنظر رکھتے ہوئے ٹرین میں سی سی ٹی وی کیمرے بھینصب کے ے گئے ہیں۔ جدید ترین ٹرین سیٹ کی رائڈ انتہائی آرام دہ ہوگی۔ اس میں کسی قسم کا جھٹکا محسوس نہیں ہوگا۔یہ ٹرین سیٹ چند سیکنڈ میں رفتار پکڑ لیتی ہے اور بہت کم وقت میں رک جاتی ہے ۔ اس کے سبب اس کی اوسط رفتار زیادہ رہتی ہے اور سفر کے وقت میں کافی کمیآتی ہے ۔
اب اتر پردیش میں 15 اور بہار میں 13 وندے بھارت ایکسپریس ٹرینیں چل رہی ہیں۔ اب تک ملک بھر میں کل 70 وندے بھارت ٹرین خدمات لوگوں کو تیز، محفوظ اور جدید ریل سفر فراہم کر رہی ہیں۔ ملک کی 24 ریاستوں اور مرکز کے زیر انتظام علاقوں کے 330 اضلاع وندے بھارت ایکسپریس ٹرین سے مربوط ہوگئے ہیں۔ وندے بھارت ایکسپریس ٹرین کا سلیپر ورژن بھی تیار ہے اور بہت جلد یہ پٹریوں پر مسافروں کو سروس فراہم کرے گا۔