جموں/۷؍اپریل
مرکزی وزیر داخلہ امت شاہ نے پیر کے روز کٹھوعہ ضلع میں ہندوستان،پاکستان بین الاقوامی سرحد کے ساتھ واقع بی ایس ایف کی ایک چوکی کا دورہ کیا۔
اطلاعات کے مطابق وزیر داخلہ نے دوپہر کے وقت جموں سے ہیلی کاپٹر کے ذریعے کٹھوعہ کے ہیرا نگر سیکٹر کے لیے روانگی اختیار کی اور بعد میں زمینی صورتحال کا جائزہ لینے کے لیے انہیں بارڈر سیکورٹی فورس (بی ایس ایف) کی چوکی’ونے‘لے جایا گیا۔
بی ایس ایف کے ڈائریکٹر جنرل دلجیت سنگھ چودھری، جموں و کشمیرپولیس کے ڈائریکٹر جنرل نالین پربھات، آئی جی بی ایس ایف ششانک آنند، اور جموں زون کے انسپکٹر جنرل آف پولیس بھیم سین توتی سمیت دیگر سینئر افسران نے وزیر داخلہ کا استقبال کیا۔
امت شاہ اتوار کی شام جموں پہنچے تھے ، جہاں انہوں نے بی جے پی کے ارکان اسمبلی اور سینئر عہدیداروں کے ساتھ میٹنگ کی۔
بی جے پی ہیڈکوارٹر میں تقریباً دو گھنٹے جاری رہنے والی اس میٹنگ کے بعد شاہ نے سوشل میڈیا پلیٹ فارم ’ایکس‘پر اپنے خیالات کا اظہار کرتے ہوئے لکھا’’وزیر اعظم نریندر مودی جی کی قیادت میں، بی جے پی جموں و کشمیر کی خوشحالی کے لیے اپنی کوششیں جاری رکھے گی‘‘۔
حکام کے مطابق، وزیر داخلہ کے دورے کے پیش نظر پولیس اور دیگر سیکورٹی ایجنسیوں کو ہائی الرٹ پر رکھا گیا ہے ۔ توقع کی جا رہی ہے کہ سینئر افسران انہیں سرحدی علاقوں کی زمینی صورتحال سے متعلق تفصیلی بریفنگ دیں گے ۔
یاد رہے کہ کٹھوعہ ضلع کے جنگلاتی علاقوں میں ۲۳مارچ سے بڑے پیمانے پر تلاشی آپریشن جاری ہے ۔
