ہندوستان-سری لنکا سرمایہ کاری پر مبنی ترقی، رابطے اور باہمی تجارت میں اضافہ کریں گے

نئی دہلی// ایک دوسرے کی سلامتی اور اسٹریٹجک مفادات کے تحفظ کے عزم کا اظہار کرتے ہوئے ہندوستان اور سری لنکا نے آج اپنی دو طرفہ شراکت داری میں سرمایہ کاری پر مبنی ترقی، رابطے اور باہمی تجارت کو بڑھانے پر اتفاق کیا۔
مذکورہ معاہدہ وزیر اعظم نریندر مودی اور سری لنکا کے صدر انورا کمارا ڈسانائیکے کے درمیان یہاں حیدرآباد ہاؤس میں وفود کی سطح پر بات چیت کے دوران طے پایا، جو یہاں ہندوستان کے دورے پر ہیں۔ ملاقات کے دوران دونوں ممالک کے درمیان استعداد کار میں اضافے اور باہمی تعاون سے متعلق دو مفاہمتی یادداشتوں پر دستخط کیے گئے ۔
میٹنگ میں سری لنکا نے تمل ناڈو کے ماہی گیروں کے مسئلے کو حل کرنے کے لیے انسانی ہمدردی پر مبنی رویہ اپنانے کے ہندوستان کے موقف کی حمایت کی اور قابل قبول حل تلاش کرنے تک ہندوستانی ماہی گیروں کی جانب سے متنازعہ علاقے میں بھاری مشینری کے ساتھ ماہی گیری روکنے کی درخواست کی۔ ہندوستان نے اس توقع کا اظہار کیا کہ تملوں کی امنگیں پوری ہوں گی۔
میٹنگ کے بعد مشترکہ پریس کانفرنس میں مسٹر مودی نے صدر ڈسانائیکا کا ہندوستان میں گرمجوشی سے خیرمقدم کرتے ہوئے کہاکہ "ہمیں خوشی ہے کہ آپ نے بطور صدر اپنے پہلے غیر ملکی دورے کے لیے ہندوستان کا انتخاب کیا ہے ۔ آج کا دورہ ہمارے تعلقات میں نئی [؟][؟]رفتار اور توانائی پیدا کر رہا ہے ۔ ہم نے اپنی شراکت داری کے لیے مستقبل کے حوالے سے نظریہ اپنایا ہے ۔ ہم نے اپنی اقتصادی شراکت داری میں سرمایہ کاری کی قیادت میں ترقی اور رابطے پر زور دیا ہے اور فیصلہ کیا ہے کہ فزیکل، ڈیجیٹل اور انرجی کنیکٹوٹی ہماری شراکت داری کے اہم ستون ہوں گے ۔
انہوں نے کہا کہ دونوں ممالک کے درمیان بجلی کی گرڈ کنیکٹیویٹی اور ملٹی پروڈکٹ پیٹرولیم پائپ لائن کے قیام پر کام کیا جائے گا۔ سمپور شمسی توانائی کے منصوبے کو تحریک دی جائے گی۔ اس کے علاوہ سری لنکا کے پاور پلانٹس کو مائع قدرتی گیس (ایل این جی) فراہم کی جائے گی۔ دو طرفہ تجارت کو فروغ دینے کے لیے دونوں فریق ‘ایکتا’ کو جلد مکمل کرنے کی کوشش کریں گے ۔
وزیر اعظم نے کہا کہ ہندوستان نے اب تک سری لنکا کو پانچ بلین ڈالر کا سستا قرض اور گرانٹ امداد فراہم کی ہے ۔ سری لنکا کے تمام 25 اضلاع میں ہمارا تعاون ہے اور ہمارے منصوبوں کا انتخاب ہمیشہ شراکت دار ممالک کی ترقیاتی ترجیحات پر مبنی ہوتا ہے ۔ اپنے ترقیاتی تعاون کو آگے بڑھاتے ہوئے ہم نے مہو-انورادھا پورم ریل سیکشن کے سگنلنگ سسٹم اور کنکیسنتھورائی بندرگاہ کے احیا کے لیے گرانٹ امداد دینے کا فیصلہ کیا ہے ۔ تعلیمی تعاون کے تحت اگلے سال سے جافنا اور مشرقی صوبے کی یونیورسٹیوں میں 200 طلباء کو ماہانہ وظائف دیے جائیں گے ۔ اگلے پانچ سالوں میں سری لنکا کے 1500 سرکاری ملازمین کو ہندوستان میں تربیت دی جائے گی۔ ہاؤسنگ، قابل تجدید توانائی اور بنیادی ڈھانچے کے ساتھ ساتھ ہندوستان سری لنکا میں زراعت، ڈیری اور ماہی پروری کی ترقی میں بھی مدد کرے گا۔ ہندوستان سری لنکا میں منفرد ڈیجیٹل شناختی پروجیکٹ میں بھی حصہ لے گا۔