’جموں وکشمیر کے وجود کو خطرے میں ڈالنے والوں کو مسترد کرنا لازمی‘

سرینگر//
جموںکشمیر نیشنل کانفرنس کے صدر‘ ڈاکٹر فاروق عبداللہ نے جمعرات کو کہاکہ بی جے پی کے پراکسی امیدواروں کو شکست سے دوچار کرنا وقت کی اہم ضرورت ہے ۔
ڈاکٹر فاروق نے کہاکہ بی جے پی کو جموں کشمیر کے عوام کے تئیں ارادے نیک نہیں ہیں، بدنیتی ،نفرت اور تعصب اُن کی رگ رگ میں بسی ہوئی ہے ، ان کشمیر دشمن عناصر نے ہمارا وجود ہر سطح پر خطرے میں ڈال دیا ہے ۔
ان باتوں کا اظہار این سی صدر نے بارہمولہ میں کارکنوں سے خطاب کے دوران کیا۔
سابق وزیر اعلیٰ نے کہا کہ اتحاد و اتفاق اور پُرعزم رہ کر دشمن عناصر کو ناکام بنایا جاسکتا ہے اور مجھے اُمید ہے کہ لوگ نیشنل کانفرنس کے پرچم تلے اتحاد اور یکجہتی کا مظاہرہ کرکے اپنی اس آبائی جماعت کو مضبوط کریں گے تاکہ جموںوکشمیر کے مظلوم اور محکوم عوام کو راحت پہنچائی جائے ۔
ڈاکٹر فاروق نے کہا کہ نیشنل کانفرنس کا انتخابی منشور غریب عوام کو راحت پہنچانے کیلئے مرتب کیا گیا اور ہمارے جماعت سے وابستہ ہر ایک فرد کی ذمہ داری بنتی ہے کہ وہ پارٹی کی طرف سے راحت کاری کے ایجنڈا کو گھر گھر پہنچائیں اور لوگوں کو اپنے منشور سے آگاہ کریں۔
بی جے پی کوتنقید کا نشانہ بناتے ہوئے ڈاکٹر فاروق نے کہاکہ بی جے پی کے پراکسی امیدواروں سے ہوشیار رہنے کی ضرورت ہے کیونکہ ان عناصر نے جموں کشمیر کے عوام کو اُن تمام آئینی اور جمہوری حقوق سے محروم کردیا جو ہمیں ملک کے آئین میں حاصل ہوئے تھے ۔