امریکا میں فائرنگ سے 3 پولیس افسران ہلاک، 5 زخمی

کیرولائنا //
امریکا کی ریاست شمالی کیرولائنا میں فائرنگ کا واقعہ پیش آیا، جس کے نتیجے میں 3 پولیس افسران ہلاک جبکہ پانچ شدید زخمی ہوگئے۔
امریکی میڈیا کا اس حوالے سے کہنا ہے کہ مطلوب ملزم نے گرفتاری سے بچنے کے لئے پولیس اہلکاروں کو فائرنگ کا نشانہ بنایا، پولیس نے جوابی فائرنگ میں ملزم کو بھی ہلاک کردیا۔
امریکی میڈیا کی رپورٹس کے مطابق پولیس اہلکار اسلحہ رکھنے کے جرم میں مطلوب شخص کو وارنٹ دینے کیلئے پہنچے تھے کہ ملزم نے ان پر فائرنگ کردی، ملزم کی فائرنگ سے متعدد اہلکار زخمی بھی ہوئے۔
ملزم کے گھر سے بھی اس دوران پولیس پر شدید فائرنگ کی گئی، بعد میں پولیس نے گھر سے ایک خاتون اور کمسن کو گرفتار کرکے اسلحہ برآمد کرلیا ہے، جبکہ واقعے سے متعلق مزید تحقیقات کا آغاز کردیا گیا ہے۔
امریکی میڈیا کا کہنا ہے کہ امریکی صدر جو بائیڈن کو پولیس افسران کے ساتھ پیش آنے والے اس افسوسناک واقعے سے متعلق آگاہ کیا گیا جس پر انہوں نے ریاست کے گورنر سے بھی رابطہ کیا۔
پریس کانفرنس کرتے ہوئے شمالی کیرولائنا شارلٹ میکلن برگ کے پولیس چیف جونی جیننگز نے کہا کہ ہلاک شدگان میں ایک ڈپٹی یو ایس مارشل بھی شامل ہے، جبکہ ہلاک ہونے والے افسران کا تعلق مختلف ایجنسیوں کے افسران پر مبنی یو ایس مارشل ٹاسک فورس سے تھا۔