انڈیا الائنس کا وجود آئین کے تحفظ کیلئے عمل میں آیا ہے :فاروق

جموں///
نیشنل کانفرنس کے صدر اور سابق وزیر اعلیٰ ‘ڈاکٹر فاروق عبداللہ کا کہنا ہے کہ انڈیا الائنس کا وجود آئین کے تحفظ کے لئے عمل میں آیا ہے ۔انہوں نے کہا کہ الائنس آئین کو دفن نہیں ہونے دے گا۔
این سی صدر نے ان باتوں کا اظہار منگل کے روز یہاں نامہ نگاروں کے سوالوں کے جواب دینے کے دوران کیا۔
فاروق نے کہا’’انڈیا الائنس کو آئین کے تحفظ کے لئے بنایا گیا مجھے ڈر ہے کہ آئین کہیں ختم نہ ہوجائے ‘‘۔
سابق وزیر اعلیٰ کا کہنا تھا’’یہاں بھی روس اور چین کی طرح راج کرنے کی کوشش کی جا رہی ہے لیکن انڈیا الائنس ایسا نہیں ہونے دے گا‘‘۔ڈاکٹر فاروق عبداللہ نے کہا کہ وہ امیبدکر جی کے آئین کی حفاظت کریں گے چاہئے اس کے لئے انہیں جان بھی کیوں نہ دینا پڑے ۔انہوں نے کہا’’انڈیا الائنس مضبوط ہے اور کوئی بھی اس کو توڑ نہیں سکتا ہے ‘‘۔
چین کے بارے میں بات کرتے ہوئے ان کا کہنا تھا’’چین کے ساتھ بات چیت کا کوئی نتیجہ نہیں نکل رہا ہے ، چین آگے بڑھ رہا ہے اس کے بارے میں کوئی بات نہیں کرتا ہے ۔‘‘