نئی دہلی//
وزیر اعظم نریندر مودی منگل کو جموں میں ۳۰ہزار کروڑ روپے سے زیادہ کے ترقیاتی پروجیکٹوں کا افتتاح کریں گے اور سنگ بنیاد رکھیں گے ، جن میں جموں و کشمیر کو باقی ہندوستان سے جوڑنے والا ادھم پور، بانہال ریلوے سیکشن کا بانہال سے سنگلدان تک تقریباً ۴۸کلومیٹر کا حصہ شامل ہے ۔
یہ پروجیکٹ صحت، تعلیم، ریل، سڑک، ہوابازی، پٹرولیم، بلدیاتی انفرااسٹرکچر سمیت کئی شعبوں سے متعلق ہیں۔
پروگرام کے دوران وزیر اعظم جموں و کشمیر کے تقریباً ۱۵۰۰نئے سرکاری طور پر بھرتی ہونے والے افراد کو تقرر نامے تقسیم کریں گے ۔ وزیر اعظم ’وکست بھارت وکست جموں‘ پروگرام کے ایک حصے کے طور پر مختلف سرکاری اسکیموں کے استفادہ کنندگان سے بھی بات چیت کریں گے ۔
ملک بھر میں تعلیم اور ہنر مندی کے بنیادی ڈھانچے کو جدید بنانے اور ترقی دینے کی سمت ایک اہم قدم کے طور پر وزیر اعظم تقریباً۱۳۳۷۵کروڑ روپے کے بہت سے پروجیکٹوں کا افتتاح ،ملک کے نام وقف اور سنگ بنیاد رکھیں گے ۔
جو پروجیکٹ ملک کے نام وقف کئے جارہے ہیں ان میں آئی آئی ٹی بھیلائی، آئی آئی ٹی تروپتی، آئی آئی ٹی جموں، آئی آئی آئی ٹی ڈی ایم کانچی پورم؛ انڈین انسٹی ٹیوٹ آف ا سکلز (آئی آئی ایس) جدید ٹیکنالوجیز پر ہنر مندی کی تربیت دینے والا ایک اہم ادارہ ، جو کانپور میں واقع ہے ، اور دیوپرایاگ (اتراکھنڈ) اور اگرتلہ (تریپورہ) میں سنٹرل سنسکرت یونیورسٹی کے دو کیمپس شامل ہیں۔
وزیر اعظم ملک میں تین نئے آئی آئی ایم یعنی آئی آئی ایم جموں، آئی آئی ایم بودھ گیا اور آئی آئی ایم وشاکھاپٹنم کا افتتاح کریں گے ۔ وہ کیندریہ ودیالیہ(کے وی ایس ) کیلئے۲۰نئی عمارتوں اور ملک بھر میں نوودیہ ودیالیہ (این وی ایس) کی۱۳نئی عمارتوں کا بھی افتتاح کریں گے ۔
وزیر اعظم ملک بھر میں نوودیہ ودیالیوں کیلئے پانچ کیندریہ ودیالیہ کیمپس، ایک نوودیہ ودیالیہ کیمپس اور پانچ کثیر المقاصد ہال کا بھی سنگ بنیاد رکھیں گے ۔ یہ نو تعمیر شدہ این وی ایس اور کے وی ایس عمارتیں ملک بھر کے طلباء کی تعلیمی ضروریات کو پورا کرنے میں اہم کردار ادا کریں گی۔
ایک ایسا قدم جو جموں و کشمیر کے لوگوں کو جامع، معیاری اور تیسرے درجے کی مکمل صحت خدمات فراہم کرے گا، وزیر اعظم آل انڈیا انسٹی ٹیوٹ آف میڈیکل سائنسز (اے آئی آئی ایم ایس)، وجے پور (سامبا)، جموں کا افتتاح کریں گے ۔یہ انسٹی ٹیوٹ، جس کا سنگ بنیاد بھی وزیر اعظم نے فروری۲۰۱۹میں رکھا تھا، مرکزی سیکٹر اسکیم پردھان منتری سواستھیہ سرکشا یوجنا کے تحت قائم کیا جا رہا ہے ۔
۱۶۶۰کروڑ سے زیادہ کی لاگت سے قائم کیا گیا اور ۲۲۷؍یکڑ سے زیادہ رقبے پر محیط یہ اسپتال۷۲۰بستروں‘۱۲۵نشستوں والا میڈیکل کالج‘۶۰ نشستوں والا نرسنگ کالج‘۳۰بستروں والا آیوش بلاک، فیکلٹی اور عملے کے لیے رہائش ،پی جی اور یو جی طلباء کے لیے ہاسٹل، نائٹ شیلٹر، گیسٹ ہاؤس، آڈیٹوریم، شاپنگ کمپلیکس وغیرہ جیسی سہولیات سے آراستہ ہے ۔ جدید ترین اسپتال۱۸اسپیشلٹیز اور ۱۷سپر اسپیشلٹیز میں مریضوں کو معیاری طبی خدمات فراہم کرے گا، جس میں کارڈیالوجی، گیسٹرو اینٹرولوجی، نیفرالوجی، یورولوجی، نیورولوجی، نیورو سرجری، میڈیکل آنکولوجی، سرجیکل آنکولوجی، اینڈو کرائنولوجی، برنس اور پلاسٹک سرجری شامل ہیں۔ انسٹی ٹیوٹ میں ایک انتہائی نگہداشت یونٹ، ایمرجنسی اور ٹراما یونٹ‘۲۰ماڈیولر آپریشن تھیٹرز، تشخیصی لیبارٹریز، بلڈ بینک، فارمیسی وغیرہ ہوں گے ۔ اسپتال خطے کے دور دراز علاقوں تک پہنچنے کیلئے ڈیجیٹل ہیلتھ انفرااسٹرکچر کا بھی فائدہ اٹھائے گا۔
وزیر اعظم جموں ہوائی اڈے پر ایک نئی ٹرمینل عمارت کا سنگ بنیاد رکھیں گے ۔۴۰ہزارمربع میٹر کے رقبے پر محیط ، اس نئی ٹرمینل عمارت کو مصروف اوقات کے دوران تقریباً ۲۰۰۰مسافروں کو خدمات فراہم کرنے سے متعلق جدید سہولیات سے آراستہ کیا جائے گا۔ نئی ٹرمینل عمارت ماحول دوست ہوگی اور اس طرح تعمیر کی جائے گی کہ یہ علاقے کی مقامی ثقافت کو ظاہر کرے ۔اس سے فضائی رابطہ مضبوط ہوگا، سیاحت اور تجارت کو فروغ ملے گا اور خطے کی اقتصادی ترقی میں تیزی آئے گی۔
وزیر اعظم جموں و کشمیر میں مختلف ریل پروجیکٹوں کو ملک کے نام وقف کریں گے جن میں بانہال،کھاری،سمبر-سنگلدان۴۸کلومیٹر)کے درمیان نئی ریل لائن اور بارہمولہ،سرینگر،بانہال،سنگلدان سیکشن (۶۶ء۱۸۵کلومیٹر) کے درمیان نئی ریل لائن شامل ہے ۔ وزیراعظم وادی میں پہلی الیکٹرک ٹرین اور سنگلدان اسٹیشن اور بارہمولہ اسٹیشن کے درمیان ٹرین خدمات کوبھی ہری جھنڈی دکھائیں گے ۔
بانہال،کھاری‘سمبر-سنگلدان سیکشن کا آغاز اہم ہے کیونکہ اس میں تمام راستے میں بیلسٹ لیس ٹریک (بی ایل ٹی) کا استعمال شامل ہے جو مسافروں کو سفر کا ایک بہتر تجربہ فراہم کرتا ہے۔اس کے علاوہ، ہندوستان کی سب سے لمبی ٹرانسپورٹ سرنگ ٹی۵۰(۷۷ء۱۲کلومیٹر) کھاری،سمبر کے درمیان اس حصے میں واقع ہے ۔ ان ریل پروجیکٹوں سے خطے کی کنکٹیویٹی بہتر ہوگی، ماحولیاتی پائیداری کو یقینی بنایا جاسکے گااور خطے کی مجموعی اقتصادی ترقی کو فروغ ملے گا۔
پروگرام کے دوران، وزیر اعظم جموں سے کٹرا کو جوڑنے والے دہلی،امرتسر، کٹرا ایکسپریس وے کے دو پیکیجوں(۲۲ء۴۴کلومیٹر) سمیت اہم سڑک پروجیکٹوں کا سنگ بنیاد رکھیں گے ۔ سری نگر رنگ روڈ کو چار لین کرنے کا دوسرا مرحلہ‘ این ایچ ون کے۱۶۱کلومیٹر طویل سرینگر،بارہمولہ،اوڑی حصے کو اپ گریڈ کرنے کے لیے پانچ پیکیج اور این ایچ۴۴۴ پر کولگام بائی پاس اور پلوامہ بائی پاس کی تعمیر شامل ہے ۔
دہلی،امرتسر،کٹرا ایکسپریس وے کے دو پیکجز، ایک بار مکمل ہو جانے کے بعد یاتریوں کو ماتا ویشنو دیوی کے مقدس مندر کے دورے میں سہولت فراہم کریں گے ، اور اس کے ساتھ ساتھ خطے میں اقتصادی ترقی کو بھی فروغ ملے گا۔ سرینگر رنگ روڈ کو چار لین کرنے کے دوسرے مرحلے میں موجودہ سنبل وایول این ایچ۰۔۱کو اپ گریڈ کرنا شامل ہے ۔
۷ء۲۴کلومیٹر لمبا یہ براؤن فیلڈ پروجیکٹ سری نگر شہر اور اس کے آس پاس ٹریفک کی بھیڑ کو کم کرے گا۔ یہ مناسبل جھیل اور کھیر بھوانی مندر جیسے مشہور سیاحتی مقامات سے رابطے کو بہتر بنائے گا، اور لیہہ، لداخ کے سفر کے وقت کو بھی کم کرے گا۔
این ایچ ون کے۱۶۱کلومیٹر لمبے سرینگر،بارہمولہ،اوڑی حصے کی اپ گریڈیشن کا منصوبہ، اسٹریٹجک اہمیت کا حامل ہے ۔ اس سے بارہمولہ اور اُوڑی کی اقتصادی ترقی کو بھی فروغ ملے گا۔ قاضی گنڈ ، کولگام ، شوپیاں ، پلوامہ ، بڈگام ، سرینگر کو جوڑنے والے این ایچ۴۴۴پر کولگام بائی پاس اور پلوامہ بائی پاس بھی خطے میں سڑک کے بنیادی ڈھانچے کو فروغ دے گا۔
وزیر اعظم جموں میں سی یو ایف (عام کامن یوزر فیسلٹی) پٹرولیم ڈپو کو فروغ دینے کے منصوبے کا سنگ بنیاد بھی رکھیں گے ۔ یہ جدید مکمل طور پر خودکار ڈپو جو تقریباً ۶۷۷کروڑ روپے کی لاگت سے تیار کیا جائے گا، اس میں موٹر اسپرٹ (ایم ایس)، ہائی اسپیڈ ڈیزل (ایچ ایس ڈی)، سپیریئر کیروسین آئل (ایس کے او،ایوی ایشن ٹربائن فیول(اے ٹی ایف) ، ایتھنول، بائیو ڈیزل اور سرمائی گریڈ ایچ ایس ڈی) کو ذخیرہ کرنے کے لیے تقریباً ایک لاکھ کے ایل ذخیرہ کرنے کی گنجائش ہوگی ۔
وزیر اعظم جموں و کشمیر میں بلدیاتی بنیادی ڈھانچے کو مضبوط بنانے اور عوامی سہولیات کی فراہمی کے لیے۳۱۵۰کروڑ روپے سے زیادہ کے کئی ترقیاتی منصوبوں کا افتتاح اور سنگ بنیاد بھی رکھیں گے ۔
وزیراعظم جن منصوبوں کا افتتاح کریں گے ان میں سڑکوں کے منصوبے اور پل، گرڈ اسٹیشنز، ریسیونگ اسٹیشنز ٹرانسمیشن لائن پروجیکٹس؛ کامن ایفلوئنٹ ٹریٹمنٹ پلانٹس اور سیوریج ٹریٹمنٹ پلانٹس؛ کئی ڈگری کالج کی عمارتیں؛ سری نگر شہر میں انٹیلیجنٹ ٹریفک مینجمنٹ سسٹم؛ جدید ناروال پھل منڈی؛ کٹھوعہ میں ڈرگ ٹیسٹنگ لیبارٹری؛ اور گاندربل اور کپواڑہ میں ۲۲۴فلیٹوں والی ٹرانزٹ رہائش گاہ شامل ہے ۔ جن منصوبوں کا سنگ بنیاد رکھا جائے گا ان میں جموں و کشمیر میں پانچ نئی انڈسٹریل اسٹیٹس کی ترقی ،جموں اسمارٹ سٹی کا انٹیگریٹڈ کمانڈ اینڈ کنٹرول سینٹر کے لیے ڈیٹا سینٹر/ڈیزاسٹر ریکوری سینٹر؛ پاریم پورہ سری نگر میں ٹرانسپورٹ نگر کی تجدید؛ اننت ناگ، کولگام، کپواڑہ، شوپیاں اور پلوامہ سمیت دیگر اضلاع میں نو مقامات پر ۶۲سڑکوں کے پروجیکٹوں اور۴۲پلوں کی تجدید اور۲۸۱۶فلیٹوں کی ٹرانزٹ رہائش کی ترقی کے لیے پروجیکٹ شامل ہیں۔
دریں اثناجموں وکشمیر بھاجپا یونٹ کے صدر رویندر رینا نے پیر کے روز کہاکہ وزیر اعظم نریندر مودی منگل کے روز ایک بڑے عوامی جلسے سے خطاب کریں گے۔
رینا نے کہاکہ ریلی میں لاکھوں کی تعداد میں لوگ شریک ہو رہے ہیں اور اس حوالے سے تمام تر تیاریاں مکمل کی جا چکی ہیں۔
ان باتوں کا اظہار رینا نے جموں میں نامہ نگاروں سے بات چیت کے دوران کیا۔
رینا نے کہاکہ وزیر اعظم نریندر مودی منگل کے روز جموں میں ایک بڑے عوامی جلسے سے خطاب کریں گے جس میں لاکھوں کی تعداد میں لوگوں کی شرکت متوقع ہیں۔انہوں نے مزید بتایا کہ جموں وکشمیر کے سبھی اضلاع سے لوگ ریلی میں شرکت کے لئے جوق در جوق پہنچ رہے ہیں۔
بی جے پی یونٹ صدر کے مطابق کشمیر کے دس اضلاع سے بھی بھاجپا کے کارکن اور عام لوگ ریلی میں شریک ہونگے۔انہوں نے ریلی میں تمام خطوں کے لوگوں کی ریکارڈ توڑ شرکت کا دعویٰ کیا ہے۔
رینا نے کہاکہ وزیر اعظم مودی نے جموں وکشمیر کو امن کا گہوارا بنایا‘ دفعہ ۳۷۰کی منسوخی کے باعث یونین ٹریٹری میں امن، ترقی اور خوشحالی کا دور شروع ہوا ہے۔بھاجپا صدر نے بتایا کہ ریلی کو کامیاب بنانے کی خاطر بی جے پی نے سبھی تیاریاں مکمل کی ہیں۔
