’راجوری پونچھ بیلٹ سے دہشت گردی کا صفایا کرنے کیلئے پرعزم ہیں‘

جموں//
جموں و کشمیر کے راجوری پونچھ علاقے کے جنگلات میں غیر ملکی دہشت گردوں کی موجودگی کا اعتراف کرتے ہوئے ڈائرکٹر جنرل آف پولیس آر آر سوائن نے ہفتہ کے روز کہا کہ سیکورٹی ایجنسیاں پیر پنجال علاقے کے جنوب سے دہشت گردی کا صفایا کرنے کیلئے پرعزم ہیں۔
سوائن نے کہا کہ دہشت گرد کچھ مقامی لوگوں کی مدد سے جنگلات کے اندر واقع خفیہ ٹھکانوں سے کارروائیاں کر رہے ہیں جن کی تعداد ’بہت محدود‘ہے۔
جموں خطے کے جڑواں اضلاع راجوری اور پونچھ میں اس سال دہشت گردی کی سرگرمیوں میں اضافہ ہوا ہے جس میں ۱۹فوجی جوان اور سات شہری ہلاک ہوئے ہیں۔ لائن آف کنٹرول (ایل او سی) پر ہونے والے انکاؤنٹر میں کم از کم۲۵دہشت گرد بھی مارے گئے ہیں کیونکہ سیکورٹی فورسز نے دراندازی کی متعدد کوششوں کو ناکام بنا دیا ہے۔
پولیس سربراہ نے کہا’’راجوری پونچھ بیلٹ میں سیکورٹی کی صورتحال ہے لیکن ہم اپنی حکمت عملی پر عوامی سطح پر بات نہیں کرنا چاہیں گے۔ حالانکہ، عوام کو یہ جاننے کے حق کے طور پر، زیادہ تر غیر ملکی دہشت گرد ہمارے علاقے کے اندر کچھ منتخب افراد کی مدد سے کام کر رہے ہیں اور اس میں کوئی شک نہیں ہے‘‘۔
تاہم سوائن نے کہا کہ دہشت گردی کے حامیوں کی تعداد’بہت محدود‘ہے اور ان’بہت محدود‘لوگوں کی شناخت کرنا ایک چیلنج ہے جو دہشت گردوں کے ساتھ ہیں اور اپنے گھروں میں نہیں رہ رہے بلکہ جنگلوں میں چھپے ہوئے ہیں۔