سرما شروع ہونے کے باوجود دراندازی کی کوششوں میں کمی نہیں آئیـ:فوج

بارہمولہ//
ہندوستانی فوج نے جمعرات کو کہا کہ موسم سرما شروع ہونے کے باوجود، بارہمولہ ضلع کے اوڑی سیکٹر میں لائن آف کنٹرول (ایل او سی) کے پار دہشت گردوں کی طرف سے دراندازی کی کوششوں میں کوئی کمی نہیں آئی ہے۔
کرنل راگھو کمانڈنگ آفیسر۸آر آر میڈیا والوں کو آپریشن ’کالی‘ کے بارے میں بریفنگ دے رہے تھے جس میں۱۵نومبر کو ایل او سی پر دراندازی کی ایک بڑی کوشش کو ناکام بنایا گیا۔
فوجی افسر نے کہا کہ آپریشن کالی، ہندوستانی فوج اور جموں و کشمیر پولیس کے درمیان مشترکہ کوشش نے ۱۵نومبر کو لائن آف کنٹرول (ایل او سی) کے ساتھ اوڑی سیکٹر میں دراندازی کی ایک کوشش کو کامیابی سے ناکام بنا دیا۔
آرمی آفیسر نے کہا’’اس آپریشن کے نتیجے میں دہشت گردوں کو نمایاں جانی نقصان ہوا اور مختلف جنگی ساز و سامان بر آمد ہوا‘‘۔
کرنل راگھو نے کہا کہ حالیہ واقعہ سردیوں کا موسم شروع ہونے کے باوجود دہشت گردوں کی اس طرف دراندازی کرنے کی مایوسی کو ظاہر کرتا ہے۔انہوں نے کہا’’لیکن ہندوستانی فوج ان کی تمام کوششوں کو ناکام بنانے کے لیے پوری طرح تیار ہے‘‘۔
کرنل راگھو نے بتایا کہ بدھ کی صبح فوج نے مصدقہ اطلاع موصول ہونے کے بعد اوڑی سیکٹر میں سیکورٹی فورسز کو جگہ جگہ تعینات کیا ۔انہوں نے بتایا کہ فوج کو خفیہ ایجنسی سے اطلاع موصول ہوئی تھی کہ پاکستانی زیر قبضہ کشمیر سے ملی ٹینٹوں کا ایک گروپ اس طرف آنے کی منصوبہ بندی کررہا ہے ۔
کمانڈنگ آفیسر کے مطابق بدھ کی صبح جوں ہی ملی ٹینٹوں کا ایک گروپ اس طرف آیا تو پہلے سے تعینات فورسز اہلکاروں نے انہیں للکارا جس دوران شدید گولیوں کا تبادلہ شروع ہوا۔ان کے مطابق گولیوں کا تبادلہ تھم جانے کے بعد سیکورٹی فورسز نے تصادم کی جگہ دو ملی ٹینٹوں کی لاشیں برآمد کی جن کی بعد میں شناخت بشیر احمد ملک اور احمد غنی شیخ کے بطور ہوئی ہے ۔
کرنل راگھونے کہاکہ تصادم آرائی کے دوران دہشت گرد گروپ میں شامل کئی ملی ٹینٹ زخمی ہوئے ہیں ۔کمانڈنگ آفیسر نے بتایا کہ جاں بحق ملی ٹینٹوں کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کرکے ضبط کیا گیا۔
فوجی کمانڈرنے پریس کانفرنس کے دوران بتایا کہ بشیر احمد ملک کے بارے میں پتہ چلا ہے کہ وہ لانچ کمانڈر کے بطور پر اپنی خدمات انجام دے رہا تھا۔انہوں نے بتایا کہ بشیر احمد ملک ملی ٹینٹوں کو اس طرف دھکیلنے میں ماہر تھا اور وہ پچھلے تین دہائیوں سے یہ کام کررہا تھا ۔انہوں نے مزید بتایا کہ جاں بحق لانچ کمانڈر متعدد کالعدم تنظیموں سے وابستہ دہشت گردوں کو بھارتی حدود میں داخل کرانے میں ملوث رہا ہے ۔
کرنل راگھو کے مطابق بشیر احمد ملک کی ہلاکت دہشت گرد تنظیموں کے لئے بہت بڑا دھچکا ہے اور یہ کہ اس کو مار گرانے سے اب دراندازی کے واقعات میں بھی غیر معمولی کمی واقع ہونے کا قوی امکان ہے ۔
فوجی کمانڈر نے بتایا کہ لانچ کمانڈر بشیر احمد ملک اتنا سرگرم دہشت گرد تھا کہ لیپا سیکٹر سے لے کر راجوری تک وہ دہشت گردوں کو اس طرف دھکیلنے میں اپنی خدمات انجام دے رہا تھا۔