سمبل حادثے میں ڈرائیور ہلاک

سرینگر//
شمالی ضلع بانڈی پورہ کے سمبل علاقے میں ٹریکٹر کی مرمت کے دوران ٹرولی گرنے کے باعث ڈرائیور کی برسر موقع ہی موت واقع ہوئی۔
اطلاعات کے مطابق سمبل بانڈی پورہ میں اس وقت سنسنی کا ماحول پھیل گیا جب ٹریکٹر کی مرمت کے دوران ڈرائیور ٹرولی کے نیچے آیا جس وجہ سے وہ شدید طورپر زخمی ہوا۔
معلوم ہوا ہے کہ آس پاس موجود لوگوں نے ڈرائیور کو علاج ومعالجہ کی خاطر سب ضلع ہسپتال سمبل منتقل کیا تاہم وہ وہاں پرجانبر نہ ہو سکا۔
متوفی کی شناخت ۲۲سالہ رائیس احمد راتھر ولد عبدالقادر راتھر ساکن وانگی پورہ بالا کے بطور ہوئی ہے ۔
دریں اثناڈوڈہ کے سب ڈویژن گندوہ میں پیر کی شام کو پیش آئے حادثے میں لاپتہ ہوئے نوجوان کی لاش منگل کی صبح برآمد کی گئی ہے ۔
اطلاعات کے مطابق گندوہ ڈوڈہ میں پیر کی شام ایک آلٹو گاڑی ڈرائیور کے قابو سے باہر ہو کر نالہ میں جاگری ۔
حادثے کی اطلاع ملتے ہی مقامی لوگوں اور پولیس نے امدادی کارروائی شروع کی جس دوران جتندر سنگھ نامی ایک نوجوان کو زخمی حالت میں ہسپتال منتقل کیا گیا جبکہ اس کے ساتھی کو پانی کے تیز بہاو نے بہا کر لیا۔معلوم ہوا ہے کہ ریسکیو ٹیم نے رات بھر تلاشی آپریشن جاری رکھا اور منگل کی صبح بھاتری نالہ میں نوجوان کی لاش برآمد کی گئی۔
متوفی کی شناخت۲۱سالہ شبھم ولد وریندر سنگھ کے بطور ہوئی ہے ۔دریں اثنا پولیس نے اس سلسلے میں کیس درج کرکے مزید تحقیقات شروع کی ۔