’زیرو ویسٹ یاترا ہمارا عزم ‘:ایل جی کا امر ناتھ یاترا کیلئے دیہی ترقی کے محکمے کے اختراعی اقدامات کا آغاز

سرینگر//
لیفٹیننٹ گورنر‘ منوج سنہا نے آج شری امرناتھ جی یاترا کو زیرو لینڈ فل یاترا بنانے کیلئے دیہی ترقی کے محکمے کے مختلف اختراعی اقدامات کا آغاز کیا۔
ایک سرکاری بیان کے مطابق ان اقدامات میں دوبارہ استعمال کے قابل کپڑے کے تھیلے، پائیدار اور ذمہ دار سیاحت کے لیے یاترا ترانہ‘ایم آئی ایس پورٹل اور فضلے کے عمل کی نگرانی کے لیے ویب ایپ شامل ہیں۔
اس موقع پر اپنے خطاب میں لیفٹیننٹ گورنر نے محکمہ دیہی ترقی اور’ سوہا ریسورس مینجمنٹ ‘کو ان کے قابل ستائش کام کے لیے مبارکباد دی۔
سنہا نے کہا’’زیرو ویسٹ یاترا ہمارا عزم ہے۔معلومات، تعلیم اور مواصلاتی مہم کو رویے کی تبدیلی کے مواصلات میں تبدیل کرنے اور ٹھوس فضلہ کے انتظام کے لیے ایک موثر ماڈل بنانے کے لیے مخلصانہ کوششیں کی جا رہی ہیں‘‘۔
ایل جی نے کہا کہ رضاکاروں کی مدد‘آئی ای سی مہم اور سالڈ ویسٹ مینجمنٹ کے چار مختلف مراحل میں ہموار کوآرڈینیشن کے ساتھ، ہمارا مقصد ماحولیات، قدرتی ورثے کے تحفظ اور قدرتی اثاثوں کے پائیدار استعمال کے تئیں گہری ذمہ داری کو جنم دینا ہے۔
لیفٹیننٹ گورنر نے کہا’’اس سال کی شری امرناتھ جی یاترا کے لیے سوچھ مہم روحانی، ثقافتی، اقتصادی اور ماحولیاتی اقدار کے تحفظ کے لیے حکومت کے عزم کی نشاندہی کرتی ہے۔ آئی ٹی ٹولز، قابل تجدید توانائی کے ذرائع کا زیادہ سے زیادہ استعمال یاتریوں کو صاف، خالص اور منفرد تجربہ یقینی بنائے گا‘‘۔
سنہا کاکہنا تھا’’آپ کا سب سے بڑا مقابلہ آپ ہیں‘‘۔ لیفٹیننٹ گورنر نے محکمہ دیہی ترقی کو پچھلے سال کے دوران سالڈ ویسٹ مینجمنٹ میں شاندار کام کرنے اور ری سائیکلنگ میں کئی سنگ میل حاصل کرنے پر بتایا۔
ایل جی کاکہنا تھا کہ اس طرح کی مربوط کوششوں اور فضلہ کے انتظام کے ماڈل کو دوسرے یاتریوں کے لیے بھی نقل کیا جا سکتا ہے۔ انہوں نے کہا کہ ہم شری ماتا ویشنو دیوی شرائن بورڈ کو اس ماڈل کا مطالعہ کرنے اور اس پر عمل درآمد کرنے کی ہدایت کریں گے۔
سنہانے یاتریوں سے موصول ہونے والے تاثرات کو بھی شیئر کیا اور اس سال یاترا کے انعقاد سے متعلق مختلف پیرامیٹرز پر درج کی گئی کامیابیوں پر روشنی ڈالی۔
اس موقع پر لیفٹیننٹ گورنر نے سسٹین ایبل اور زیرو لینڈ فل یاترا مہم کے لیے نشان، آئی ای سی مواد اور رہنما خطوط بھی جاری کیے۔
دیہی ترقی کا محکمہ’ سواہا ریسورس مینجمنٹ ‘کے ساتھ شراکت میں کام کر رہا ہے۔ یاترا کا ترانہ نامور بالی ووڈ گلوکار شان مکھرجی نے صفائی ستھرائی اور پائیداری کے بارے میں بیداری پھیلانے کے لیے گایا ہے۔