اے ڈی جی پی کشمیر کا شوپیاں، پلوامہ کا دورہ‘سکیورٹی صورتحال کا جائزہ

سرینگر//
ایڈیشنل ڈائرکٹر جنرل آف پولیس(اے ڈی جی پی) کشمیر‘ وجے کمار نے بدھ کو جنوبی کشمیر کے شوپیاں اور پلوامہ اضلاع کا دورہ کیا اور دہشت گردی کی باقیات کو ختم کرنے کے لیے افسروں کی تعریف کی۔
کمار نے دونوں اضلاع میںسیکورٹی منظر نامے کا جائزہ لیا۔
آفیسران کے ساتھ میٹنگ کے دوران اے ڈی جی پی نے جنوبی کشمیر میں سرگرم ملی ٹینٹوں کے خلاف آپریشنز میں تیزی لانے کے احکامات جاری کئے۔
پولیس کے ایک ترجمان نے بتایا کہ میٹنگ کے دوران اے ڈی جی پی کو جنوبی کشمیر کی سیکورٹی صورتحال کے بارے میں جانکاری فراہم کی گئی۔
معلوم ہوا ہے کہ اے ڈی جی پی نے میٹنگ کے دوران آفیسران کو ہدایت دی کہ وہ خصوصی ٹیمیں تشکیل دے کر سرگرم ملی ٹینٹوں کے خلاف بڑے پیمانے پر آپریشنز شروع کریں۔
اس موقع پر اے ڈی جی پی نے آفیسران کو ہدایت دی کہ جنوبی کشمیر میں جتنے بھی سرگرم ملی ٹینٹ ہیں انہیں کیفر کردار تک پہنچانے کی خاطر ملی ٹینٹ مخالف آپریشنز کو مزید وسع کریں تاکہ ملک دشمن عناصر کے منصوبوں کو پوری طرح سے ناکام بنایا جاسکے۔