جموں/۲۳ جون
گاندھی، عبداللہ اور مفتی خاندان پر تنقید کرتے ہوئے مرکزی وزیر داخلہ امت شاہ نے جمعہ کو تینوں خاندانوں پر الزام لگایا کہ وہ 1947 سے 2014 تک جموں و کشمیر میں 42000 لوگوں کے قتل کے ذمہ دار ہیں۔
شدید گرمی کے درمیان جموں کے بگوتی نگر ریلی گراو¿نڈ میں ایک بڑے اجتماع سے خطاب کرتے ہوئے، وزیر داخلہ نے کہا کہ وہ دن گئے جب تین خاندان جموں و کشمیر پر حکومت کرتے اور اس کو برباد کرتے۔ ان کاکہنا تھا””1947 سے 2014 تک، جموں و کشمیر میں 42000 لوگ مارے گئے۔کون اس عرصے میں حکومت کر رہے تھے…. یہ تین خاندان – گاندھی، عبداللہ اور مفتی“۔
بی جے پی کے نظریاتی، ڈاکٹر شیما پرساد مکھرجی کو ان کی برسی پر خراج عقیدت پیش کرتے ہوئے، شاہ نے کہا کہ ڈاکٹر مکھرجی کو 1953 میں بغیر اجازت جموں و کشمیر میں داخل ہونے پر غیر قانونی طور پر گرفتار کیا گیا تھا۔ ”اپنے ملک میں داخل ہونے کے لیے اجازت نامہ کی ضرورت کیوں ہے؟ انہیں جیل میں ڈال دیا گیا اور بعد میں قتل کر دیا گیا“۔
وزیر داخلہ نے مزید کہا کہ آج ”ڈاکٹر مکھرجی کی روح سکون سے رہے گی کیونکہ ایک ودھان، ایک نشان اور ایک پردھان کا ان کا مشن اور ویڑن پورا ہوا ہے“۔
وزیر داخلہ نے کہا کہ ڈاکٹر مکھر جی پہلے شخص تھے جنہوں نے ہندوستانی آئین میں دفعہ 370 کو شامل کرنے کی مخالفت اس بہانے کی کہ ”ایک قوم کے پاس دو جھنڈے، دو آئین اور دو سر نہیں ہو سکتے“۔
شاہ نے کہا، "5 اگست، 2019 کو، وزیر اعظم نریندر مودی نے ایک بڑا قدم اٹھایا اور آرٹیکل 370 کو ہمیشہ کے لیے ہٹا دیا اور ڈاکٹر مکھر جی کے ویڑن کو پورا کیا“۔انہوں نے مزید کہا کہ اگر مغربی بنگال آج ہندوستان کے ساتھ ہے تو یہ ڈاکٹر مکھرجی کے ویڑن کی وجہ سے ہے۔
وفاقی وزیر داخلہ نے کہا” ہندوستان پی ایم مودی کی حکومت کے نو سال کا جشن منا رہا ہے۔ مودی جی کی حکمرانی کھلی کتاب ہے۔ یہ یو پی اے کی طرح نہیں ہے جس نے 12 لاکھ کروڑ روپے کا گھوٹالہ کیا۔ مودی جی کے نو سالہ دور حکومت میں ایک بھی بدعنوانی کا الزام نہیں ہے“۔
شاہ نے کہا کہ جموں ترقی کی نئی بلندیوں کو چھو رہا ہے اور آج شہر میں کروڑوں روپے کے منصوبوں کا افتتاح کیا گیا۔ انہوں نے کہا کہ بی جے پی نے دہشت گردی پر شکنجہ کسا اور آج ’دہشت گردی بستر مرگ پر ہے‘۔
وزیر داخلہ کاکہنا تھا” یو پی اے کے دس سالہ دور حکومت میں دہشت گردی کے 60,327 واقعات ہوئے۔ مودی جی کے نو سالہ دور حکومت میں دہشت گردی اپنی کم ترین سطح کو چھو گئی۔ آرٹیکل 370 کی منسوخی کے بعد 47 مہینوں میں، ہڑتالوں کی صرف 32 کالیں آئیں جبکہ پتھراو¿ میں 90 فیصد کمی واقع ہوئی“۔ انہوں نے مزید کہا”جموں و کشمیر کے نوجوانوں نے پتھروں کی جگہ لیپ ٹاپ اور کتابیں لے لی ہیں“۔
شاہ نے کہا کہ 2022 میں پہلی بار 1.88 کروڑ سیاحوں نے جموں و کشمیر کا دورہ کیا۔ 2024 کے پارلیمانی انتخابات کے لیے جموں کے لوگوں سے مودی کے لیے حمایت حاصل کرنے کی کوشش کرتے ہوئے، انھوں نے کہا کہ ”راہل بابا اور مودی جی“ کا کوئی موازنہ نہیں ہے۔ انہوں نے کہا کہ ہم 2024 کے انتخابات میں 300 سے زیادہ سیٹیں جیتیں گے۔ وزیر داخلہ نے کہا کہ اس سال 22 مئی سے 25 مئی کو سری نگر میں کامیاب G-20 سربراہی اجلاس ایک "شاندار کامیابی” تھا۔
"ہر غیر ملکی معززین آرٹیکل 370 کی منسوخی کے بعد امن اور کشمیر کو تبدیل کرنے کا پیغام لے کر اپنے اپنے ممالک کو واپس گیا ہے،“۔ انہوں نے سری نگر میں G-20 سربراہی اجلاس کے ہموار انعقاد کا سہرا ایل جی منوج سنہا کو دیا۔
