الیکشن کمیشن اتنا تو بتائے کہ وہ یہاں الیکشن کیوں نہیں کرارہا ہے‘عمر کا سوال

سرینگر//
نیشنل کانفرنس کے نائب صدر اور سابق وزیر اعلیٰ عمر عبداللہ کا کہنا ہے کہ ہم جموں وکشمیر میں اسمبلی انتخابات منعقد کرانے کیلئے بھیک نہیں مانگیں گے ۔
عمر نے کہا کہ الیکشن کمیشن کو چاہئے کہ وہ ہمت کرکے بتائے کہ وہ یہاں الیکشن کیوں نہیں کرا رہا ہے۔ان کا کہنا تھا کہ الیکشن جموں و کشمیر کے لوگوں کا حق ہے جس کو چھینا گیا ہے ۔
سابق وزیر اعلیٰ نے ان باتوں کا اظہار منگل کو یہاں پارٹی ہیڈ کوارٹر کے باہر نامہ نگاروں کے ساتھ بات کرتے ہوئے کیا۔
عمرعبداللہ نے کہا’’الیکشن کرانے ہیں تو کریں نہ کرانے ہیں تو نہ کریں، ہم گھٹنے ٹیک کر بھیک نہیں مانگیں گے ہمارا بھی عزت نفس ہے‘‘۔ان کا کہنا تھا’’الیکشن کمیشن کو اس کا جواب دینا چاہئے ہم ان سے سننا چاہتے ہیں ان کی کیا مجبوریاں ہیں ان پر کیا دبائو ہے کہ وہ تاخیر کر رہے ہیں‘‘۔
نیشنل کانفرنس کے نائب صدر نے کہا’’چیف الیکشن کمیشن نے جموں کشمیر کے دورے کے دوران کہا تھا کہ یہاں ایک خلا ہے جس کو پورا کرنا ہے اب وہ ہمت کرکے کہیں کہ ان پر کیا دبائو ہے یہاں دال میں کچھ کالا نظر آتا ہے ‘‘۔
ایک سوال کے جواب میں عمر عبداللہ نے کہا’’یہاں حالات ٹھیک نہیں ہیں ایسے علاقوں میں ملی ٹنسی ہے جن سے ملی ٹنسی کو صاف کر دیا گیا تھا اب ان کے لوگ بھی سیکورٹی مانگ رہے ہیں‘‘۔انہوں نے کہا’’جی ٹونٹی اجلاس کرکے حالات پر پردہ ڈالا گیا لیکن مقامی لوگ حقیقت سے واقف ہیں کہ ایک جگہ سے دوسری جگہ جانے میں کتنا وقت لگتا ہے ‘‘۔
سابق وزیر اعلیٰ کا کہنا تھا کہ پانچ منٹوں کی مسافت طے کرنے میں چالیس منٹ لگ جاتے ہیں۔انہوں نے کہا طلبا وقت پر سکول نہیں پہنچ رہے ہیں اور مریض ایمبولینس میں ہی دم توڑ دیتے ہیں۔
سابق وزیر اعلیٰ نے کہا کہ الیکشن جموں وکشمیر کے لوگوں کا حق ہے ۔انہوں نے کہا’’اگر ان کو یہ حق چھین کے بہت بڑی تسلی ہوتی ہے تو ٹھیک ہے ۔‘‘