سرینگر/۸نومبر
محکمہ موسمیات کی طرف سے وادی کشمیر میں برف و باراں کے ایک اور مرحلے کی پیش گوئی کے بیچ وادی کے مشہور سیاحتی مقامات گلمرگ اور پہلگام میں شبانہ درجہ حرارت نقطہ انجماد سے نیچے درج ہوا ہے ۔
متعلقہ محکمے ایک ترجمان کا کہنا ہے کہ وادی میں 9 نومبر سے 11 نومبر کی دوپہر تک ہلکی سے درمیانی درجے کی برف باری یا بارشیں ہونے کا امکان ہے ۔انہوں نے کہا تاہم اس دوران وادی میں موسم بڑے پیمانے پر خراب ہونے کا کوئی امکان نہیں ہے ۔
ان کا کہنا تھا کہ بعد ازاں وادی میں 12 سے 16 نومبر تک موسم مجموعی طور خشک مگر ابر آلود رہنے کی توقع ہے ۔
خراب موسم سے پڑنے والے اثرات کے حوالے سے متعلقہ محکمے کا کہنا ہے کہ وادی میں 10 اور11 نومبر کو سرینگر، جموں قومی شاہراہ، زوجیلا پاس، لیہہ منالی روڈ اور دیگر جگہوں پر ٹریفک کی نقل و حمل عارضی طور پر متاثر ہوسکتی ہے ۔
لوگوں سے کہا گیا ہے کہ وہ مذکورہ بالا سڑکوں پر سفر کرنے سے قبل ٹریفک حکام سے رابطہ کریں اور سفر کے دوران گرم لباس وغیرہ اپنے ساتھ رکھیں۔
ادھر وادی کے مشہور سیاحتی مقامات گلمرگ اور پہلگام میں شبانہ درجہ حرارت نقطہ انجماد سے نیچے درج ہوا ہے ۔
گلمرگ میں کم سے کم درجہ حرارت منفی2.6 ڈگری سینٹی گریڈ ریکارڈ کیا گیا جبکہ پہلگام میں کم سے کم درجہ حرارت منفی1.6 ڈگری سینٹی گریڈ ریکارڈ ہوا ہے ۔
دارلحکومت سری نگر میں کم سے کم درجہ حرارت4.3 ڈگری سینٹی گریڈ ریکارڈ کیا گیا جو معمول سے 2.5 ڈگری سینٹی گریڈ زیادہ ریکارڈ ہوا تھا۔
شمالی ضلع کپوارہ میں کم سے کم درجہ حرارت2.8 ڈگری سینٹی گریڈ ریکارڈ کیا گیا جو معمول سے 1.5 ڈگری سینٹی گریڈ زیادہ ریکارڈ ہوا تھا۔
قصبہ قاضی گنڈ میں کم سے کم درجہ حرارت5.0 ڈگری سینٹی گریڈ ریکارڈ کیا گیا جو معمول سے 0.5 ڈگری سینٹی گریڈ کم ریکارڈ ہوا تھا۔
دریں اثنا وادی میں منگل کی صبح سے ہی موسم خشک رہا اور آفتاب اور بادلوں کے درمیان دن بھر سنگھرش جاری رہا۔
