مودی کی کشمیر پر خصوصی توجہ سے امن قائم ہوا:چودھری

سرینگر//
مرکزی وزیر مملکت برائے خزانہ ‘پنکج چودھری نے آج کہا کہ وزیر اعظم نریندر مودی کی کشمیر پر خصوصی توجہ ہے جس کی وجہ سے زمین پر امن نظر آ رہا ہے۔
وزیر مملکت نے یہ بات یہاں کاروبار اور صنعت کے اسٹیک ہولڈرز کے ساتھ ان سے متعلق مختلف مسائل پر تبادلہ خیال کیلئے ایک میٹنگ کی صدارت کرتے ہوئے کہی۔
پبلک آؤٹ ریچ پروگرام کے ایک حصے کے طور پر‘ چودھری نے کہا کہ یہ پی ایم مودی کے ویژن کی وجہ سے ہے کہ وزراء تمام اسٹیک ہولڈرز سے ان کی دہلیز پر جا کر ملاقات کر رہے ہیں۔
چودھری نے کہا کہ وزیراعظم کی کوشش ہے کہ حکومت میں شامل تمام افراد لوگوں اور اسٹیک ہولڈرز سے یکساں ملاقاتیں کریں تاکہ زمینی صورتحال کا جائزہ لیا جا سکے۔
مرکزی وزیر مملکت نے کہا کہ کشمیر میں امن ہر دوسری سرگرمی کیلئے شرط ہے اور باقی تمام چیزیں خود بخود ہو جائیں گی۔انہوں نے تجارتی انجمنوں کے سربراہوں کو بتایا ’’اور اس سب کیلئے ہمیں آپ کے تعاون کی ضرورت ہے، انتظامیہ میں ہمارے افسران بھی موجود ہیں کیونکہ حکومت ہند کشمیر میں امن قائم کرنے کیلئے پرعزم ہے اور وہ اس سلسلے میں درست سمت میں آگے بڑھ رہی ہے۔‘‘
قبل ازیں کشمیر سے تعلق رکھنے والے کاروباری اور صنعت کے کئی سربراہوں اور نمائندوں نے مرکزی وزیر مملکت کے سامنے اپنے مسائل اور شکایات پیش کیں۔
صدر کشمیر چیمبر آف کامرس اینڈ انڈسٹری (کے سی سی آئی)، عاشق احمد شیخ؛ جنرل سیکرٹری فیڈریشن چیمبرز آف انڈسٹریز کشمیر، اویس قادری جامی‘ چیئرمین کشمیر اکنامک الائنس شوکت چوہدری‘ پی ایچ ڈی چیمبر آف کامرس اینڈ انڈسٹری کے بلال احمد کاووسہ نے وادی کشمیر میں کاروبار اور صنعت سے متعلق مختلف مسائل پر تفصیلی بات کی۔
ٹریڈ ایسوسی ایشن کے نمائندوں نے بزنس یونٹس کے گھٹائے گئے کھاتوں، کاروبار کی بحالی، نئی صنعتی پالیسی میں موجودہ کاروباری یونٹس کو شامل کرنے، کاروباری نقصانات کے ازالے، سبسڈی وغیرہ کے بارے میں بات کی۔
تاجروں کے نمائندوں کو جواب دیتے ہوئے، مرکزی وزیر مملکت نے یقین دلایا کہ ان کے سامنے رکھے گئے تمام حقیقی مسائل اور شکایات کو متعلقہ محکموں کے پاس ضرور اٹھایا جائے گا۔
اس سے پہلے، کمشنر، ریاستی ٹیکس محکمہ، ڈاکٹر رشمی سنگھ نے وزیر کو محکمہ میں گڈ گورننس کے طریقوں کے سلسلے میں محکمہ کے تازہ ترین سفر کے بارے میں بتایا۔انہوں نے کہا کہ محکمہ سرمایہ کاری کیلئے سازگار ماحول فراہم کر رہا ہے اور خوشحال اور پرامن جموں و کشمیر کے وزیر اعظم کے خواب کو پورا کرنے کیلئے پوری لگن اور خلوص کے ساتھ کام کر رہا ہے۔
بعد میں، وزیر نے مختلف محکموں کے افسران کی میٹنگ کی صدارت بھی کی اور مرکزی حکومت کے مختلف پروگراموں اور مرکز کے زیر انتظام جموں و کشمیر میں حکومت ہند کی تمام پالیسیوں اور پروگراموں کے نفاذ پر تبادلہ خیال کیا۔