جموں میں ایک سال کا قیام ووٹ دینے کا اہل بنا سکتا ہے

جموں//
حکام نے ضلع جموں میں ایک سال سے زیادہ عرصے سے مقیم لوگوں کو بھی انتخابی فہرستوں میں شامل کرنے کی ہدایت دی ہے اور ریونیو اہلکاروں کو اختیار دیا گیا ہے کہ وہ ان لوگوں کو رہائشی اسناد جاری کریں۔
یہ ہدایات ضلع الیکشن افسر اور ضلع مجسٹریٹ جموں اونی لواسہ کی طرف سے جاری کی گئی ہیں۔
بتادیں کہ جموں و کشمیر انتظامیہ کی طرف سے یونین ٹریٹری میں نئے ووٹروں کے اندراج، حذف کرنے ، تصحیح کرنے ،انتقال کرنے والے ووٹروں کی منتقلی وغیرہ کیلئے انتخابی فہرستوں کی خصوصی سمری نظر ثانی۱۵ستمبر سے شروع ہوئی ہے ۔
جموں وکشمیر کی سیاسی جماعتوں نیشنل کانفرنس، پی ڈی پی، جموں وکشمیر پیپلز کانفرنس نے جموں انتظامیہ کے اس اقدام پر گوناگوں خدشات کا اظہار کیا ہے ۔
حکمنامے میں الیکشن کمیشن آف انڈیا کے رہنما خطوط کا حوالہ دیتے ہوئے کہا گیا کہ اہل رائے دہندگان کے اندراج کے لئے مطلوبہ دستاویزات کی عدم دستابی کی صورت میں زمینی سطح پر ویری فکیشن کی جائے گی۔
ان مطلوبہ دستاویزات میں آدھار کارڈ، انڈین پاسپورٹ، بینک پاس بک، رجسٹرڈ کرایہ نامہ وغیرہ شامل ہیں۔
حکمنامے میں کہا گیا’’انتخابی رجسٹریشن افسران اور اسسٹنٹ الیکٹورل رجسٹریشن افسران سمیت فیلڈ عہدیداروں کے ساتھ کئی گئی جائزہ میٹنگوں کے دوران یہ بات سامنے آگئی کہ کچھ اہل ووٹروں کو دستاویزات کی عدم دستابی کی وجہ سے ووٹر لسٹ میں اندارج کیلئے مشکلات کا سامنا کرنا پڑ رہا ہے ‘‘۔
ضلع مجسٹریٹ کی طرف سے جاری حکمنامے میں مزید کہا گیا کہ خصوصی سمری نظر ثانی۲۰۲۲کے دوران تمام اہل ووٹروں کے لسٹ میں اندراج کو یقینی بنانے کے لئے تحصیلداروں کو یہ اختیار دیا گیا ہے کہ وہ ضروری فیلڈ تصدیق کے بعد اس شخص کو رہائشی سند جاری کریں جو ضلع جموں میں زائد از ایک سال کے عرصے سے مقیم ہے ۔
ڈی سی کے اس حکم سے ان لوگوں کو فائدہ پہنچے گا جو جموں و کشمیر کے ڈومیسائل ہیں لیکن فی الحال اپنے آبائی علاقے میں مقیم نہیں ہیں اور موجودہ علاقے سے ووٹ ڈالنا چاہتے ہیں۔
واضح رہے کہ گذشتہ روز جموں کے نرواچن بون میں آج چیف الیکٹورل آفیسر جموں کشمیر ہردیش کمار نے ایک پریس کانفرنس منعقد کی، جس میں انہوں نے کہا کہ جموں و کشمیر میں آئندہ اسمبلی انتخابات میں غیر مقامی لوگ ووٹ ڈال سکتے ہیں جو جموں و کشمیر میں سرکاری نجی یا مزدوری کرنے کی غرض سے کام کررہے ہیں۔ اب جموں کشمیر میں ووٹ کا اندراج کرستے ہیں تاہم بیرون ریاست کے لوگ کچھ شرائط پر ووٹر سلپ حاصل کرسکتے ہیں جن میں ڈومیسائل سرٹیفکیٹ شامل ہے۔
جموں کشمیر کے چیف الیکٹورل آفیسر نے کہا کہ مرکز کے زیر انتظام علاقے میں تقریباً ۲۵ لاکھ نئے ووٹرز کے اندراج کی امید ہے کیونکہ ۲۰۱۹ میں دفعہ۳۷۰ کی منسوخی کے بعد پہلی بار انتخابی فہرستوں کی خصوصی سمری پر نظرثانی کی جا رہی ہے۔
حکم پر ردعمل ظاہر کرتے ہوئے، نیشنل کانفرنس نے ٹویٹ کیا’’حکومت جموں و کشمیر میں۲۵ لاکھ غیر مقامی ووٹرز کو شامل کرنے کے اپنے منصوبے کے ساتھ آگے بڑھ رہی ہے اور ہم اس اقدام کی مخالفت کرتے رہتے ہیں‘‘۔
نیشنل کانفرنس کاکہنا ہے کہ بی جے پی انتخابات سے خوفزدہ ہے اور جانتی ہے کہ وہ بری طرح ہارے گی۔ ’’جموں و کشمیر کے لوگوں کو بیلٹ باکس میں ان سازشوں کو شکست دینا ہوگی‘‘۔
بی جے پی کے علاوہ تقریباً تمام سیاسی جماعتوں نے غیر مقامی لوگوں کو بطور ووٹر شامل کرنے کی سخت مخالفت کی ہے۔
یہ ایک مسئلہ اس وقت سامنے آیا جب اگست میں اس وقت کے چیف الیکٹورل آفیسر ہردیش کمار نے کہا کہ جموں و کشمیر میں تقریباً ۲۵ لاکھ اضافی ووٹر آنے کا امکان ہے، جن میں باہر کے لوگ بھی شامل ہیں۔