سرینگر/۷اکتوبر
محکمہ اسکول ایجوکیشن نے جموں کشمیر میں سبھی جماعتوں کےلئے یکساں تعلیمی کلینڈر نافذ کیا ہے، جس کے تحت اب پہلی سے نویں جماعت کے سالانہ امتحانات مارچ۔اپریل میں منعقد کیے جائیں گے۔
اس حوالے سے جمعہ کو باضابطہ طور پرنسپل سیکرٹری محکمہ اسکول ایجوکیشن کی جانب سے ایک حکم نامہ جاری کیا گیا۔
حکم نامے کے مطابق یکساں تعلیمی کلینڈر کے نفاذ کو منظوری دی گئی ہے۔ایسے میں اب تمام سرکاری اور پرائیویٹ اسکولوں میں پہلی سے۹ویں جماعت کے امتحانات مارچ۔اپریل سیشن میں لیے جائیں گے۔
حکم نامہ میں یہ بھی کہا گیا یے کہ نیا داخلہ کلینڈر آئندہ برس مارچ کے مہینے سے شروع ہوگا۔
یہ بات قابل ہے کہ جموںکشمیر انتظامیہ نے دسویں سے بارہویں جماعت کے بورڈ امتحانات مارچ سیشن سے منعقد کرنے کا پہلے ہی حکم جاری کیا ہے۔
جموں و کشمیر میں تھیوری امتحان مارچ کے پہلے ہفتہ سے جموں سمر زون کے موجودہ اکیڈمک کلینڈر کے مطابق منعقد کیا جائے گے،سوائے جموں کے چند مشکل علاقوں کے اور خطہ کشمیر کے کچھ علاقوں میں،تاہم مشکل علاقوں میں امتحان میں تاخیر اور اپریل کے دوسرے ہفتے سے تجویز کردہ کلینڈر کے مطابق انعقاد کیا جائے گا جب یہ علاقے مکمل طور پر قابل رسائی بن جائے گے۔اگر چہ ان مشکل علاقوں میں الگ الگ امتحان لیا جائے گا، لیکن امتحانات کے نتائج کا اعلان بیک وقت کیا جائے گا۔
بتادیں کہ گزشتہ روز ڈائریکٹر اسکول ایجوکیشن کشمیر تصدق حسین میرنے کہا تھا کہ اول سے نویں جماعت تک کے طلبہ کے امتحانات کا مارچ سیشن میں منعقد ہونے کے قوی امکانات ہیں اور اس سلسلے میں ایک دو دنوں کے اندر باقاعدہ اعلان کیا جائے گا۔
