چیف سیکریٹری کااین ایچ ۴۴پر ٹریفک کی نقل و حمل کا جائزہ

سرینگر//
سیب سے لدی مال بردار گاڑیوں کے درماندہ ہونے کی شکایات کے تناظر میں جموں کشمیر کے چیف سیکریٹری‘ڈاکٹر ارون کمار مہتا نے آج یہاں این ایچ ۴۴( سرینگر جموں قومی شاہراہ ) پر ٹریفک کی نقل و حرکت کا ایک میڑنگ میں جائزہ لیا۔
میٹنگ کے دوران کہا گیا کہ مال بر دار گاڑیوں کو مغل روڈ استعمال کرنے کی ترغیب دی جانی چاہئے ۔
میٹنگ کے حوالے سے ایک سرکاری بیان میں کہا گیا ’’ ڈویژنل انتظامیہ کشمیر سے کہا گیا کہ وہ ایچ ایم ویز کو مغل روڈ استعمال کرنے کی ترغیب دیں۔اس سلسلے میںاے ڈی جی جموں کو پوشانہ چوکی کے بہتر انتظام کو یقینی بنانے کیلئے کہا گیا تا کہ موقع پر گاڑیوں کی چیکنگ کو تیز کیا جا سکے‘‘ ۔
پریشانی سے پاک نقل و حرکت کو یقینی بنانے کیلئے یہ فیصلہ کیا گیا کہ ایچ ایم ویز کے ڈاؤن قافلے کو صبح ۱۱ بجے سے قاضی گنڈ سے رات ۹ بجے تک متبادل دنوں میں جانے کی اجازت دی جائے گی ۔ اس میں کہا گیا کہ ڈرائیوروں کو مناسب طریقے سے آگاہ کیا جائے کہ وہ شاہراہ پر کہیں بھی اپنی گاڑیاں کھڑی نہ کریں ۔
مزید براں ضلع انتظامیہ رام بن کو ہدایت دی گئی کہ وہ بانہال مارکیٹ میں مناسب افرادی قوت اور ٹریفک منیجمنٹ ٹیم کی تعیناتی کو یقینی بنائے تا کہ سڑک کے کنارے گاڑیوں کی پارکنگ اور ٹھیلے والوں کے ذریعہ کیریج وے پر قبضے نہ کرنے کو یقینی بنایا جا سکے ۔ اس میں کہا گیا کہ پبلک ٹرانسپورٹرز کو بھی قائل کیا جائے کہ وہ مسافروں کی سواری کیلئے اپنی گاڑیاں قومی شاہراہ پر کھڑی نہ کریں بلکہ اس مقصد کیلئے مخصوص جگہوں کو ہی استعمال کریں ۔
مزید یہ کہ این ایچ اے آئی کو ہدایت دی گئی تھی کہ وہ کیفٹیریا موڑ اور مہر سے کیچڑ کی صفائی ، بانہال اور رام بن کے درمیان این ایچ پر گڈھے والے حصے کو بلیک ٹاپ کرنے ، ٹی ۔ ۵ ٹنل کی تکمیل اور رامسو ۔ رامپاری ۔ شیر بیبی اسٹریچ کو چوڑا کرنے کیلئے پچھلی میٹنگ کے دوران دی گئی ٹائم لائن پر عمل کرے ۔
میٹنگ میں یہ بھی فیصلہ کیا گیا کہ این ایچ۴۴ کے کیفٹیریا ۔ مہر سیکشن کو مستحکم کرنے کیلئے اٹھائے جانے والے اقدامات کیلئے سی بی آر آئی ، روڑکی اور آئی آئی ٹی جموں کی مشترکہ مطالعاتی ٹیم کی مناسب سفارشات لی جائیں اور این ایچ اے آئی کی طرف سے اسے تیزی سے نافذ کیا جائے تا کہ ہائی وے پر سفر کا وقت کافی حد تک کم ہو جائے ۔
چیف سیکریٹری نے ہدایت دی کہ محکمہ ٹریفک اسٹیک ہولڈرز کیلئے روزانہ انفارمیشن بلیٹن جاری کرے جس میں قاضی گنڈ سے جکھینی تک ایچ ایم ویز کے سفر میں لگنے والے وقت ، کیفٹیریا موڑ ۔ مہر میں پتھراؤ کی وجہ سے ہونے والے وقت کے نقصان اور جموں کیلئے روانگی کیلئے منتظر گاڑیوں کی تعداد کا ذکر کیا جائے ۔
ڈاکٹر مہتا نے ٹریفک پولیس کی طرف سے مضبوط مواصلات اور معلوماتی طریقہ کار کو نافذ کرنے پر بھی زور دیا تا کہ قاضی گنڈ ۔ بانہال مارکیٹ ، شیر بیبی ، پنتھال ، مہر وغیرہ جیسے اہم مقامات پر ایچ ایم ویز کی ٹریفک کو منظم کیا جا سکے ۔
ٹریفک منیجمنٹ کے حکام سے کہا گیا کہ وہ رام بن اور بانہال کے درمیان اہم راستوں میں لین ڈسپلن کو نافذ کرنے کے علاوہ ٹریفک کو بہترین طریقے سے منظم کرنے کیلئے تمام ذرائع سے افرادی قوت کی ضرورت کو پورا کرے ۔
موسمی نقل مکانی کیلئے قبائلی امور کے محکمے اور ڈپٹی کمشنروں کو اس بات کو یقینی بنانے کی ہدایت دی گئی کہ این ایچ۴۴ پر خاص طور پر قاضی گنڈ اور رام بن کے درمیان کسی بھی’ ڈیرے ‘کو جانے کی اجازت نہ دی جائے اور انہیں اپنے مویشیوں اور خاندان کے افراد کو لے جانے کیلئے مناسب گاڑی فراہم کی جائے ۔ متعلقہ ضلعی انتظامیہ سے کہا گیا کہ وہ اس بات کو یقینی بنائیں کہ لاوارث مویشی ہائی وے پر نہ پھریں ۔