اوڑی میں تیندوے نے بچی کو اپنا نوالہ بنایا، تین ماہ میں چوتھا واقعہ

سرینگر//
شمالی کشمیر کے ضلع بارہمولہ کے قصبہ اوڑی میں گذشتہ شام جس۶سالہ بچی کو ایک تیندوا اٹھا لے گیا تھا اس کی لاش گاؤشر جنگل علاقے سے دوران شب بر آمد کی گئی۔
یہ اوڑی علاقے میں گذشتہ تین ماہ کے دوران اس نوعیت کا پیش آنے والا چوتھا واقعہ ہے ۔
سرکاری ذرائع نے بتایا کہ اوڑی کے بجہامہ علاقے میں جمعے کی شام ایک تینوے نے ایک۶سالہ بچی کو اٹھا لیا اور اس کو گاؤشر جنگل میں لے گیا۔بچی کی شناخت ۶سالہ منزہ دختر عمران احمد بیگ کے بطور ہوئی ہے ۔انہوں نے کہا کہ واقعہ پیش آتے ہی اہلخانہ نے شو رغل مچایا لیکن بچی کو تیندے کی پکڑ سے بچانے میں کامیاب نہیں ہوسکے ۔
ان کا کہنا تھا ک بعد ازاں ایک پولیس پارٹی اور مقامی لوگوں نے بچی کی تلاش شروع کی اور کافی محنت و مشقت کے بعد اس کی لاش کو رات دیر گئے بر آمد کیا گیا۔
قابل ذکر ہے کہ سال رواں کے۱۱جون کو اوڑی کے ہی ترکنگن علاقے میں تیندے نے ایک بچی کو مار ڈالا تھا جبکہ اس کے ایک دن بعد ایک اور بچہ تیندوے کا شکار ہوا تھا اور۱۴جون کو اسی علاقے میں ایک اور کمسن بچے کو اپنا نوالہ بنایا تھا۔
محکمہ وائلڈ لائف نے بعد میں دعویٰ کیا تھا کہ تین بچوں کو اپنا نوالہ بنانے والے تیندوے کو پکڑ لیا گیا ہے ۔
متعلقہ محکمہ کے مطابق سال رواں کے دوران چھ بچوں سمیت آٹھ افراد کو جنگلی جانوروں نے اپنا نوالہ بنایا۔