سرینگر؍۱۶ نومبر
کاؤنٹر انٹیلی جنس کشمیر (سی آئی کے) نے پیر کے روز ممنوعہ تنظیم دی ریزسٹنس فرنٹ (ٹی آر ایف) کو جموں و کشمیر میں فنڈز فراہم کرنے اور ان کی ترسیل کی مبینہ سازش کے معاملے میں چھ ملزمان کے خلاف چارج شیٹ دائر کر دی ہے۔ ملزمان میں بیرون ملک مقیم تین مبینہ مفرور افراد بھی شامل ہیں۔
یہ چارج شیٹ سرینگر کی خصوصی عدالت (این آئی اے ایکٹ کے تحت نامزد ٹاڈا/پوٹا عدالت) میں ایک ایف آئی آر نمبر کے سلسلے میں دائر کی گئی۔ اس معاملے میں غیر قانونی سرگرمیوں کی روک تھام سے متعلق قانون (یو اے پی اے) کی متعلقہ دفعات جبکہ بھارتیہ نیائے سنہتا (بی این ایس) کی دیگر متعلقہ دفعات کے تحت مقدمہ درج کیا گیا تھا۔
سی آئی کے کے مطابق، تحقیقات کے دوران انکشاف ہوا کہ پاکستان سے سرگرم ٹی آر ایف سے وابستہ جنگجو مختار احمد بابا مبینہ طور پر حوالہ اور دیگر خفیہ ذرائع کے ذریعے جموں و کشمیر میں رقوم منتقل کر رہا تھا۔
ایجنسی نے الزام لگایا کہ سرینگر کے تین رہائشی عرفان گل، شازیہ نذیر اور ریاض احمد گوجری عمرہ ادا کرنے کی غرض سے سعودی عرب گئے تھے، جہاں انہوں نے مبینہ طور پر مختار احمد بابا کے ساتھیوں سے ملاقات کی اور ایسی رقوم حاصل کیں جو دہشت گردو ں‘ علیحدگی پسندوں اور دہشت گردوں کے بالائی زمینی کارکنوں (او جی ڈبلیوز) میں تقسیم کی جانی تھیں۔
سی آئی کے نے مزید بتایا کہ تحقیقات کے دوران کی گئی تلاشی کارروائیوں میں اہم شواہد پر مشتمل ڈیجیٹل آلات بھی ضبط کیے گئے۔
سرینگر کے تینوں رہائشیوں کے خلاف بھارتیہ نیائے سنہتا کی متعلقہ دفعات اور یو اے پی اے کی دفعہ۱۳ کے تحت الزامات عائد کیے گئے ہیں۔
سی آئی کے کے مطابق، باقی تین ملزمان میں دبئی میں مقیم بتائے جانے والے محمد اقبال نعیمہ، لندن میں مقیم شمیمہ شال اور پاکستان سے سرگرم مختار احمد بابا شامل ہیں۔ یہ تینوں ملزمان مفرور ہیں اور ان کے خلاف بھارتیہ نیائے سنہتا کی متعلقہ دفعات کے علاوہ یو اے پی اے کی دیگر متعلقہ دفعات کے تحت چارج شیٹ دائر کی گئی ہے۔
۔۔۔۔۔۔(ایجنسیاں )










