لیہہ/؍۲۳اکتوبر
لداخ کے چیف الیکٹورل افسر نے جمعہ کو لیہہ اور کرگل میونسپل کمیٹیوں کے انتخابات۲۱ نومبر کو کرانے کا اعلان کیا۔ دونوں بلدیاتی اداروں کے مجموعی طور پر۳۸ وارڈوں میں انتخابات ہوں گے۔
لداخ میں آخری پنچایتی اور بلدیاتی انتخابات۲۰۱۸ میں اُس وقت ہوئے تھے جب یہ خطہ سابق ریاست جموں و کشمیر کا حصہ تھا۔ دونوں بلدیاتی اداروں کی مدت مکمل ہوچکی ہے۔
چیف الیکٹورل افسر راہل شرما کی جانب سے جاری کردہ پریس نوٹ کے مطابق، لیہہ میونسپل کمیٹی کے۲۱ اور کرگل میونسپل کمیٹی کے۱۷ وارڈوں کی انتخابی فہرستیں جمعرات کو شائع کی گئیں۔ یکم اکتوبر کو ووٹر فہرستوں کی تیاری کے لیے اہلیت کی تاریخ مقرر کیا گیا تھا۔
مجوزہ انتخابی شیڈول کے مطابق، بلدیاتی انتخابات کا نوٹیفکیشن۲۹؍اکتوبر کو جاری کیا جائے گا، جبکہ امیدوار۵ نومبر تک اپنے کاغذاتِ نامزدگی داخل کرسکیں گے۔
پریس نوٹ میں کہا گیا ہے کہ کاغذاتِ نامزدگی کی جانچ پڑتال۶نومبر کو ہوگی، جبکہ امیدوار۹ نومبر تک اپنی نامزدگیاں واپس لے سکیں گے۔
انتخابی نشانات کی الاٹمنٹ اور انتخابات میں حصہ لینے والے امیدواروں کی فہرست بھی۹ نومبر کو جاری کی جائے گی، جبکہ پولنگ۲۱ نومبر کو ہوگی۔ انتخابی عمل۳۰ نومبر تک مکمل کرنے کا منصوبہ ہے۔
یہ انتخابات جموں و کشمیر میونسپل ایکٹ۲۰۰۰؍اور جموں و کشمیر میونسپل کمیٹی (انتخابات) قواعد۲۰۰۳کی دفعات کے تحت کرائے جا رہے ہیں۔
پریس نوٹ کے مطابق، ضابطۂ اخلاق فوری طور پر نافذ العمل ہوگا اور انتخابی عمل مکمل ہونے تک برقرار رہے گا۔
سیاسی جماعتوں، امیدواروں اور متعلقہ حکام کو ہدایت دی گئی ہے کہ وہ ضابطۂ اخلاق اور مجاز اتھارٹی کی جانب سے جاری کردہ ہدایات پر سختی سے عمل کریں۔
۔۔۔۔۔۔۔۔(ایجنسیاں )
