ورون چکرورتی کی واپسی سے ہندوستان کے سامنے انتخابی الجھن

کرائسٹ چرچ، 21 اکتوبر (یواین آئی) نیوزی لینڈ کے خلاف پہلے ٹی20 سے قبل ہندوستان کے سامنے سب سے بڑا سوال اسپن آل راؤنڈرز کے انتخاب کا ہے۔ ہندوستانی ٹیم گھریلو میدان پر اکشر پٹیل، نمن دھیر اور ایک تیز گیندبازی آل راؤنڈر کے ذریعے آٹھ اوورز مکمل کرنے کی حکمت عملی اپناتی رہی ہے، لیکن نیوزی لینڈ میں اسے اس میں تبدیلی کرنا پڑ سکتی ہے۔ ٹیم نمن دھیر کو باہر بٹھا کر دو تیز گیندبازی آل راؤنڈرز کو موقع دے سکتی ہے، حالانکہ دھیر نے اپنے گزشتہ میچ میں چھ گیندوں پر 24 رنز بنائے تھے۔
ویسٹ انڈیز کے خلاف بارش سے منسوخ ہونے والے سیریز کے فیصلہ کن میچ میں بھونیشور کمار کی واپسی ہوئی تھی اور تجربے کی بنیاد پر انہیں ایک بار پھر پلیئنگ الیون میں جگہ مل سکتی ہے۔ تاہم سب سے بڑا سوال فٹ ہو چکے ورون چکرورتی کو آخری الیون میں شامل کرنے کا ہے۔ کیا ہندوستان ایک مِسٹری اسپنر کو کھلائے گا یا تیسرے تیز گیندباز کو؟ کرائسٹ چرچ میں کھیلے گئے گزشتہ ٹی20 بین الاقوامی میچ میں جنوبی افریقہ نے تین اسپنرز کو میدان میں اتارا تھا، لیکن وہ سیزن کا آخری مرحلہ تھا۔ گرمیوں کے آغاز میں یہاں حالات تیز گیندبازوں کے لیے زیادہ سازگار رہتے ہیں۔
میزبان نیوزی لینڈ کو مارک چیپ مین کی غیر موجودگی ضرور کھلے گی، تاہم اسپن میں اس کے پاس کپتان مچل سینٹنر کے علاوہ مائیکل بریسویل اور گلین فلپس جیسے تین اختیارات ہیں۔ فلپس صرف بلے باز کے طور پر بھی پلیئنگ الیون میں جگہ بنا سکتے ہیں۔ تیز گیندبازی میں جیکب ڈفی، میٹ ہنری، ایڈم ملن، لوکی فرگوسن، کائل جیمیسن اور بلیئر ٹکنر میں سے انتخاب کیا جا سکتا ہے۔
راچن رویندرا چوٹ کے باعث باہر ہیں، اس لیے فن ایلن اور ٹم سیفرٹ کے ساتھ ڈیون کونوے ٹاپ تھری میں بلے بازی کر سکتے ہیں۔
نیوزی لینڈ (ممکنہ): فن ایلن، ٹم سیفرٹ (وکٹ کیپر)، ڈیون کونوے، گلین فلپس، ڈیرل مچل، مائیکل بریسویل، مچل سینٹنر (کپتان)، نیتھن اسمتھ، کائل جیمیسن، میٹ ہنری، لوکی فرگوسن۔
ہندوستان (ممکنہ): ابھیشیک شرما، سنجو سیمسن (وکٹ کیپر)، ایشان کشن، شریئس ایئر (کپتان)، تلک ورما، شیوم دوبے، نتیش کمار ریڈی، اکشر پٹیل، بھونیشور کمار، پرنس یادو/ورون چکرورتی، ارشدیپ سنگھ۔