دہلی میں ای رکشوں کی تعداد ڈھائی لاکھ تک محدود کرنے کی تجویز

نئی دہلی، 19 اکتوبر (یو این آئی) دہلی کے محکمہ ٹرانسپورٹ نے دارالحکومت میں ای رکشوں کی تعداد ڈھائی لاکھ تک محدود کرنے، لازمی تعمیلی سرٹیفکیٹ متعارف کرانے اور اسکیم کے نوٹیفکیشن کے بعد سڑکوں پر چلنے والے غیر رجسٹرڈ ای رکشوں کو ضبط کرکے تلف کرنے کی تجویز پیش کی ہے۔
محکمہ نے 18 اکتوبر کو جاری کردہ سرکلر کے ذریعے مسودہ ‘دہلی ای رکشہ (رجسٹریشن و آپریشن) اسکیم 2026’ عوامی مشاورت کے لیے جاری کردیا ہے۔ اس کے تحت متعلقہ فریقوں اور عوام سے اشاعت کے 30 دن کے اندر تجاویز اور اعتراضات طلب کیے گئے ہیں۔
یہ تجاویز ابھی نافذ نہیں ہوئی ہیں۔ اسکیم سرکاری گزٹ میں اشاعت کے بعد نافذ العمل ہوگی اور ابتدائی طور پر پانچ سال تک مؤثر رہے گی، تاہم اس مدت سے پہلے اس میں ترمیم، توسیع یا اسے واپس لیا جاسکتا ہے۔
مسودے کے مطابق، پہلے سے رجسٹرڈ ای رکشوں کو نوٹیفکیشن جاری ہونے کی تاریخ سے 90 دن کے اندر، یا محکمہ کی جانب سے مقرر کردہ توسیعی مدت کے دوران، ای رکشہ تعمیلی سرٹیفکیٹ (ای سی سی) حاصل کرنا ہوگا۔
ای رکشوں کی تعداد کی حد اس مدت کے ختم ہونے کے بعد نافذ ہوگی، تاکہ پہلے سے رجسٹرڈ گاڑیوں کو سرٹیفکیٹ حاصل کرنے کا عمل مکمل کرنے کا موقع مل سکے۔ اس کے بعد نئے سرٹیفکیٹ جاری کرنے پر پابندیاں عائد ہوں گی۔ ہر درست ای سی سی رکھنے والی گاڑی کو مقررہ حد میں شمار کیا جائے گا، جس پر حکومت نظرثانی بھی کرسکے گی۔
ڈیجیٹل طریقے سے جاری ہونے والا ہر سرٹیفکیٹ دو سال تک کارآمد ہوگا، بشرطیکہ اسے اس سے پہلے معطل یا منسوخ نہ کردیا جائے۔ ہر سرٹیفکیٹ کے ذریعے ایک گاڑی کو ایک مجاز ڈرائیور سے منسلک کیا جائے گا۔ ایک ہی ڈرائیونگ لائسنس کو بیک وقت ایک سے زیادہ کارآمد سرٹیفکیٹ کے ساتھ منسلک کرنے کی اجازت نہیں ہوگی۔
نوٹیفکیشن کے بعد سڑکوں پر چلتے ہوئے پائے جانے والے غیر رجسٹرڈ ای رکشوں کو فوری طور پر ضبط کرلیا جائے گا۔
مسودے میں کہا گیا ہے کہ ”کسی بھی غیر رجسٹرڈ ای رکشے کو ضبط کیے جانے کے بعد کسی بھی صورت میں واپس نہیں کیا جائے گا۔” ایسے ای رکشوں کو مقررہ رہنما خطوط کے مطابق توڑ کر تلف کیا جائے گا اور ان کی نیلامی کی جائے گی، جبکہ ان کی بیٹریاں تلف کرنے کے لیے رجسٹرڈ ری سائیکلنگ اداروں کو نیلام کی جائیں گی۔