اپنے کشمیر میں سب کچھ مہنگا ہے…. سب کچھ ۔ہر ایک چیز کی قیمت آسمان کو چھوتی نظر آ رہی ہے ….یہ کبھی پیچھے مڑ کے نہیں دیکھتی ہے ‘ ایک بار اس نے اٹھان لی تو اللہ میاں کی قسم پھر اس کی پرواز نہیں رک جاتی ہے …. بالکل بھی نہیں رکتی ہے ۔اس لئے صاحب اگر کوئی یہ کہے کہ کشمیر دنیا کے مہنگے ترین مقامات میں سے ایک ہے تو ہم آنکھیں بند کر کے اس پر یقین کریں گے ….یقیناً کشمیر مہنگا نہیں ہو نا چاہیے …. بالکل بھی نہیں ہو نا چاہیے کہ اس کی اتنی اوقات کہاں …. لیکن صاحب سچ تو یہی ہے کہ یہ مہنگا ہے …. یہاں ہر ایک چیز مہنگی ہے ….یقیناً ملک کے دوسرے حصوں میں بھی مہنگائی ہے ‘آسمان سے باتیں کرتی مہنگائی ہے …. جس نے ہماری طرح دوسرے دیش واسیوں کا بھی جینا محال کردیا ہے…. مشکل کردیا ہے…. لیکن پھر بھی کشمیر اور ملک کے دوسرے حصوں میںایک فرق ہے ….اور فرق یہ ہے کہ وہاں سب کچھ مہنگا ہے ‘ہر ایک چیز کی ایک قیمت ہے‘لیکن یہاں ایک چیز کی قیمت نہیں ہے اور…. اور بالکل بھی نہیں ہے…. یہ سستی ہے ‘اس کی کوئی قدر و قیمت نہیں ہے اور…. اور بالکل بھی نہیں ہے اور…. اور وہ آپ او ر ہم ہیں‘ کشمیر کے واسی ہیں ‘جن کی کوئی قیمت نہیں ہے …. کتوں…. آوارہ کتوں کی قیمت ہے ‘اتنی زیادہ ہے کہ کوئی ان کو ہاتھ لگانے سے پہلے دس نہیں بلکہ سو بار سوچے گا …. لیکن…. لیکن صاحب ہم انسانوں کی کوئی قیمت نہیں ہے…. اور یہ بات یہ کتے…. آوارہ کتے بھی جان گئے ہیں‘ اسی لئے تو…. تو وہ جہاں چاہیں ‘ جب چاہیں ہم پر حملہ آور ہو سکتے ہیں اور…. اور ہو رہے ہیں …. اس لئے ہو رہے ہیں کہ ان کی سمجھ میں بھی ہماری اوقات آگئی ہے اور …. اورسو فیصد آگئی ہے ۔ کوئی انہیں روکنے والا نہیں ہے ‘ٹوکنے والا بھی نہیں ہے …. کہ بات ان کے حقوق کی ہے ….کتوں…. آوارہ کتوں کے حقوق کی ہے….حقوق جو محفوظ رہنے چاہئیں ‘ جن پر کوئی صرب نہیں آنی چاہیے۔ رہی آپ کی اور ہماری بات‘ جو ان کتوں…. آوارہ کتوں کے تر نوالہ بن جاتے ہیں‘ یا بنتے جا رہے ہیں تو…. تو صاحب یہ بھی کوئی بات ہوئی …. اور اس لئے نہیں ہوئی کہ ہماری کوئی اوقات ہے اور …. اور نہ کوئی قیمت ۔….کتوں…. آوارہ کتوں کی ہے …. اوقات بھی اور قیمت بھی ۔ہے نا؟
۔۔۔۔۔۔۔۔۔۔۔
