لیہ؍۳ستمبر
مرکزی حکومت کی جانب سے لداخ کے تمام۷ اضلاع میں نئے خودمختار پہاڑی ترقیاتی کونسلوں(ایل اے ایچ ڈی سیز) کے قیام سے متعلق تاریخی فیصلے پر آج مہرِ تصدیق ثبت ہوگئی، جب لداخ کے لیفٹیننٹ گورنر ‘وِنائی کمار سکسینہ نے۷ ایل اے ایچ ڈی سی کے قیام سے متعلق نوٹیفکیشن کی منظوری دے دی۔
مرکزی حکومت نے۱۳ جولائی۲۰۲۶ کو مرکز کے زیر انتظام خطے لداخ میں نئی ایل اے ایچ ڈی سیز کے قیام کا اعلان کیا تھا۔
لیفٹیننٹ گورنر نے اس تاریخی اقدام پر وزیراعظم نریندر مودی اور مرکزی وزیر داخلہ امت شاہ کا شکریہ ادا کرتے ہوئے کہا کہ ساتوں کونسلوں کے قیام سے مقامی حکمرانی کو مزید غیر مرکزی اور مضبوط بنایا جا سکے گا۔ اس کے ذریعے مقامی خواہشات اور ترجیحات کو ضلعی سطح پر منصوبہ بندی اور ترقی کے عمل میں زیادہ مؤثر انداز میں شامل کیا جا سکے گا۔
اس منظوری کے بعد لداخ کی خودمختار پہاڑی ترقیاتی کونسلیں اب خطے کے تمام سات اضلاع‘ لیہ، کرگل، شم، نوبرا، چانگ تھانگ، زنسکار اور دراس تک توسیع پا جائیں گی۔ منتخب مقامی خود حکمرانی کا جو نظام اس سے قبل صرف لیہ اور کرگل تک محدود تھا، اب اسے مرکز کے زیر انتظام خطے کے نئے قائم کیے گئے پانچ اضلاع تک بھی وسعت دی جائے گی۔
اس پیش رفت کو لداخ میں اختیارات کی نچلی سطح تک منتقلی اور بنیادی سطح پر حکمرانی کو مضبوط بنانے کی جانب ایک اہم قدم قرار دیا گیا ہے۔ نئی کونسلوں کے قیام سے مقامی لوگوں کو اپنے اپنے اضلاع کی ترقی اور انتظامی معاملات میں زیادہ مؤثر شرکت کے لیے ادارہ جاتی میکانزم دستیاب ہوں گے۔
لیفٹیننٹ گورنر شری وِنائی کمار سکسینہ نے کہا، ’’تمام سات اضلاع میں خودمختار پہاڑی ترقیاتی کونسلوں کا قیام لداخ میں بنیادی سطح کی حکمرانی کو مضبوط بنانے کی جانب ایک سنگِ میل ہے۔ اس سے عوام بااختیار ہوں گے اور ترقیاتی عمل کو مقامی ضروریات اور خواہشات کے مطابق زیادہ مؤثر بنانے میں مدد ملے گی۔‘‘
لداخ کے ریونیو محکمہ کی جانب سے جاری نوٹیفکیشن میں کہا گیا ہے کہ نئی تشکیل دی گئی کونسلوں کے انتخابات مناسب وقت پر منعقد کیے جائیں گے۔ اس سے قبل لداخ خودمختار پہاڑی ترقیاتی کونسل ایکٹ۱۹۹۷ کی دفعہ۸ کے تحت باضابطہ نوٹیفکیشن جاری کیا جائے گا۔
نوٹیفکیشن سرکاری گزٹ میں اشاعت کی تاریخ سے نافذ العمل ہوگا۔
۔۔۔۔۔۔۔۔۔۔ایجنسیاں
