ڈرائیونگ لائسنس کے لیے گریڈڈ پوائنٹ سسٹم پر غور، ڈرائیور کی ہر غلطی پر کٹیں گے پوائنٹس

نئی دہلی، 03 ستمبر (یو این آئی) حکومت ڈرائیونگ لائسنس کے لیے گریڈڈ پوائنٹ سسٹم پر غور کر رہی ہے جس کے تحت ڈرائیور کی ہر غلطی پر اس کے پوائنٹس کٹیں گے اور ایک مقررہ حد سے کم پوائنٹس ہونے پر لائسنس کی معطلی یا اسے منسوخ کرنے کا بھی بندوبست ہوگا۔
سڑک ٹرانسپورٹ کے مرکزی وزیر نتن گڈکری نے یہاں گاڑی بنانے والی کمپنیوں کی تنظیم سیام کے 66 ویں سالانہ اجلاس میں ایک بحث کے دوران کہا کہ ملک میں سڑک حادثات ملک کے سامنے ایک بڑا مسئلہ ہیں۔ ملک میں ہر سال تقریباً پانچ لاکھ سڑک حادثات ہوتے ہیں، جن میں سے تقریباً 1.20 لاکھ لوگوں کی جان چلی جاتی ہے۔ انہوں نے کہا کہ ڈرائیور کا رویہ اس میں ایک بہت بڑا مسئلہ ہے۔ اسے کنٹرول کرنے کے لیے حکومت کئی اقدامات کر رہی ہے۔ انہوں نے کہا، "میری وزارت ڈرائیونگ لائسنس اور گاڑی کی رجسٹریشن سررٹیفکٹ میں گریڈڈ پوائنٹ سسٹم نافذ کرنے کا منصوبہ بنا رہی ہے۔” مسٹر گڈکری نے بتایا کہ ہر ٹریفک قانون کی خلاف ورزی پر ڈرائیونگ لائسنس سے کچھ پوائنٹس کاٹے جائیں گے۔ جب پوائنٹس ایک مقررہ حد سے نیچے رہ جائیں گے، تو ڈرائیونگ لائسنس کو معطل کیا جا سکتا ہے اور آگے چل کر اسے منسوخ بھی کیا جا سکتا ہے۔
انہوں نے کہا کہ مسلسل غلطیاں کرنے والوں کو یہ کہہ کر نہیں چھوڑا جا سکتا کہ وہ غلطیوں سے سیکھ رہے ہیں۔ انہوں نے کہا، "ہمیں کہیں نہ کہیں ان لوگوں کی حوصلہ شکنی کرنی ہوگی، جو عوام کی صحت اور عوامی سلامتی (کو نقصان پہنچانے) کے ذمہ دار ہیں۔” مرکزی وزیر نے کہا کہ اس پالیسی کے پیچھے بنیادی اصول یہی ہے کہ جن لوگوں کا ڈرائیونگ ریکارڈ اچھا ہوگا، انہیں انشورنس کمپنیوں یا دیگر اداروں کی طرف سے ترغیب اور دوسرے فائدے دیے جا سکتے ہیں۔ وہیں، جو لوگ بار بار اور عادت کے طور پر ٹریفک قوانین کی خلاف ورزی کرتے ہیں، ان کے لیے سزا کا بندوبست ہوگا۔