ایران میں امریکی فضائی حملے، 19 افراد جاں بحق، 70 سے زائد زخمی

تہران، 3 ستمبر (یو این آئی): ایران کے مختلف علاقوں میں گزشتہ رات مبینہ امریکی فضائی حملوں کے نتیجے میں کم از کم 19 افراد جاں بحق جبکہ 70 سے زائد زخمی ہوگئے۔ ایرانی ذرائع کے مطابق ہلاک ہونے والوں میں 12 شہری اور 7 فوجی و نیم فوجی اہلکار شامل ہیں۔
ایرانی خبر رساں اداروں کے مطابق صوبہ کرمانشاہ میں کیے گئے ایک حملے میں پاسداران انقلاب کی ایرو اسپیس فورس کے چار اہلکار ہلاک ہوئے، جبکہ لاوان جزیرے پر ہونے والی کارروائی میں بسیج فورس کے تین اہلکاروں کی ہلاکت کی اطلاع دی گئی ہے۔
صوبہ خوزستان میں بھی امریکی میزائل حملوں کی اطلاعات سامنے آئی ہیں، جہاں مختلف مقامات کو نشانہ بنائے جانے کے نتیجے میں سات افراد جاں بحق اور آٹھ دیگر زخمی ہوئے۔
دوسری جانب صوبہ ہرمزگان کے شہر سیرک میں ایک شادی کی تقریب بھی حملے کی زد میں آگئی۔ ایرانی حکام کے مطابق واقعے میں ایک بچے سمیت پانچ افراد جان کی بازی ہار گئے، جبکہ 68 افراد زخمی ہوئے۔ اس واقعے نے مقامی سطح پر شدید تشویش اور غم کی کیفیت پیدا کردی ہے۔
ایرانی میڈیا کے مطابق اہواز، چابہار، قشم اور بندر عباس سمیت متعدد علاقوں میں دھماکوں کی آوازیں سنی گئیں۔ اس کے علاوہ جیرفت ہوائی اڈے اور خلیج فارس کے ساحل پر واقع اہم توانائی مرکز عسلویہ میں بھی حملوں اور دھماکوں کی اطلاعات موصول ہوئی ہیں۔
حملوں کے بعد متاثرہ علاقوں میں امدادی سرگرمیاں تیز کردی گئی ہیں جبکہ حکام ہلاکتوں اور نقصانات کی مزید تفصیلات جمع کررہے ہیں۔ تاہم مختلف مقامات پر ہونے والے حملوں کی مکمل نوعیت اور مجموعی نقصان کا اندازہ تحقیقات مکمل ہونے کے بعد ہی سامنے آسکے گا۔